Jowai: Mynta ka sngi u Superintending Engineer (PHE), Rural Circle Shillong ma Chibor Najiar ula ïoh ban pyllait paidbah ïa ka kot kaba la thoh da ka samla Rupda RY Lato kaba ai kyrteng ka “PHASES” ha ka jingïalang kaba la long ha Panaliar Jowai.
Ha kane ka sngi la ïadonlang ruh kiba ha ïing ha sem jong ka Rupda naduh u kpa jong ka u ma Riquoma Rq Laloo uba long u Waheh Shnong ka Panaliar, ki kha ki man bad kiwei de kiba la shah khot sngewbha, ha ka jingïalang kaba la pynlong ha Yungwalieh ka Dorbar Shnong Panaliar Jowai.
Na ka liang u kongsan ma Chibor Najiar haba ai jingkren u la kit bok kit rwiang ïa ka samla Rupda ba kan nangïaid sha khmat ha ki kam jong ka, u la ai ruh ka jingïaroh ïa ka, namar ka dei ka samla kaba don bun ki sap ki phong ym tang ha ka thoh kot hynrei ha ka jingïakop thei bha briew ha ki rynsan bah kiba ka la ïoh ruh ban mih khmat ïa ka ri India.
Ïa kane ka kot jong ka samla Rupda lah ban ïoh lyngba ka Amazon bad Flipkart.
Kum ban shu pynkynmaw ka samla Rupda RY Lato 22 snem ka rta, ka long kawei na ki samla na nongbah Jowai kaba shong ba sah ha ka shnong Panaliar Jowai. Kan sa mih khmat ïa ka ri India ha ka jingiakop Miss Aura International Beauty Pageant ha nongbah Antalya jong ka Ri Turkey, ka ban sa pynlong ha une u bnai September haduh u October 2023.
