Pyllait paidbah u MLA bad MDC ka Mawphlang ïa 2 tylli ki kot ba la thoh da u Bah Pynshailang L Mawphlang
Shillong, Naiwieng 20 : U Bah Eugeneson Lyngdoh MLA ka Mawphlang constituency ryngkat u MDC u Bah Lamphrang Blah ha ka sngi Saitjaiñ ka 19 tarik Naiwieng 2022 kila pyllait paitbah ïa ar tylli ki kot ba la thoh da u Bah Pynshailang Lyngdoh Mawphlang kaba kynthup ïa ka Thylliej Ksiar bynta ba Nongkong ki Phawar Khasi bad ka Thylliej Ksiar bynta baar ki Poetry Na La Ri.
U Bah Pynshailang haba kren ha ka jingïalang ha Madan Shad ha Mawphlang u la ïathuh ba ïa kine ki kot u la thoh ha u snem 2016 bad ha kane ka kot u la thoh ïa ka jingïoh ka Meghalaya ïa ka jylla ba pura, ka jingwan lyngshop ka khlam Covid-19, Ka Por Samla, Ka Phawar Lyngdoh Mawphlang, Phawar Kynoi Khun, Phawar Elekshon bad kiwei kiwei. Ha kine ki kot u Bah Pynshailang u la pashat jingmut ruh sha ki paidbah ba ka ladei ka por ban pynkylla noh ïa ka kyrteng Meghalaya sha ka kyrteng trai Ri. U Bah Pynshailang u la ïathuh ruh ïa ka jingïaid lynti jong u ha kaba thoh ïa kine ki ar tylli ki kot lyngba ka jingïarap jong kiba bun.
U Bah Pynshailang Lyngdoh ym tang ba udei u nongthoh kot hynrei udei ruh u nongthaw jingrwai, u nongrwai, nongphawar bad u nongshna duitara.
U Bah Eugeneson Lyngdoh MLA ka Mawphlang haba kren kum u kongsan ula ai ka jingkitbok kitrwiang ïa u Bah Pynshailang ba un dang ïai kiew shaphrang bad ban pyndonkam hok ïa ka sap ba U Blei U la ai kyrpang. U la kyntu ïa ki paidbah ba kin ai mynsiem lem bad kyrshan ïa u Bah Pynshailang da kaba thied bad pule ïa kine ki kot kiban ai jingmyntoi ruh na bynta jong ki.
Ha kane ka sngi la ïoh ruh ki jingkren na u Bah Lamphrang Blah uba la pyllait ruh ïa ka jingrwai ba la thoh bad rwai hi da u Bah Pynshailang, nangta na u General secretary ka Khasi Authors Society, Lyngdoh ka Hima Mawphlang, u President ka Synjuk Rangbah Shnong Bah Auspicious Lyngdoh Mawphlang bad kiwei kiwei. La pynkup burom ruh ïa arngut ki nonghikai da u Bah Auspicious bad ka jingsam ïa ki khusnam nongjop ha ka jingïakop rwai bad phawar. La ïadonlang ruh ha kane ka sngi ki kaitor ba kynthup u Bah Desmund Sun, Gabriel T Mawlong bad Bateithymmai, kiba haïing hasem jong u Bah Pynshailang, ki riew rangbah longkmie longkpa, ki samla haduh ki hep kiba rit.
Ïa kine ki kot lah ban ïoh na Ri Khasi Book Agency, Khasi Book stall ha synod Complex, bad Bella Book Centre.