Pyllait paidbah u CM ia ka Homestay Mission, ka website bad helpline number

Shillong, Nailur 29 : U Myntri Rangbah ka Jylla, Conrad K Sangma ha ka sngi Nyngkong u la pyllait paidbah ïa ka Chief Minister’s Meghalaya Homestay Mission kaban kyrshan ïa ki nongshong shnong ka jylla haduh 70 persen ka subsidy ban shna ïa ki homestay ha kylleng ki bynta jong ka jylla.
Ha kane kajuh ka sngi, u Myntri Rangbah u la pyllait paidbah ruh ïa ka u Helpline Number ban ïarap ïa ki nongjngohkai pyrthei kiba kwah wan sha ka jylla ba la tip kum u – OneConnect Meghalaya Tourism Helpline number (1800-599-2026). Lyngba une u Helpline ki paidbah na kylleng ki bynta jong ka ri ne shabar ruh ki lah ban ïoh ïa ki jingtip kiba ïadei bad ki jaka jngohkai pyrthei ha ki 7 tylli ki jait ktien kata ha ka English, Hindi, Bengali, Assamese, Khasi, Pnar bad ruh ha ka Ktien Garo naduh ka por 8:00 baje mynstep haduh ka por 8:00 baje mynmiet.
Hadien kane u Myntri Rangbah u la pyllait paidbah ruh ïa Website ba thymmai jong ka tnad Tourism kaba la pynbit pynbiang bad pynbha shuh shuh na kaba mynshwa bad kumjuh ïa ki 10 tylli ki kali kiban kit ïa ki nongleit nongwan jngohkai kiba la tip kum ki Meghalaya PRIME Tourism Vehicle Scheme.
Na ka liang u Myntri Rangbah haba kren halor ka Homestay Mission, u la ïathuh ba lyngba kane ka Mission kito kiba kwah ban aplai kin ïoh ia ka subsidy kaba haduh 70 persen. “Lyngba kane ka Mission la buh thong ban ïoh haduh 3,000 tylli ki homestay kiba tei thymmai kiban mih la kumno kumno sa 6000 tylli ki kamra ha shwa jong u snem 2028,” u la ong haba kren ha ka jingïalang rakhe ïa ka World Tourism Day hynne ka sngi ha ka nongbah.
U Myntri Rangbah u ong ba kane ka sienjam ba ki shim kadei hadien ba ki ïohi ba ka jingtuid ki nongwanjngohkai pyrthei sha ka jylla ka la nang kiew stet bha. Katkum ka jingïathuh jong u, ka jylla ka la sakhi haduh 16 lak ngut ki nongwankai tang na ka Ri bad haduh 2.3 lak ngut ki nongjngohkai pyrthei kiba wan na shabar ri.
“Kine ki dei ki dak kiba paw shynna kiba pyni ïa ka jingnang kiew ka jingwan ki nongjngohkai pyrthei sha ka jylla,” u la ong.
Nangta u la ïathuh ruh ba mynta ki la don haduh 210 tylli ki jingtei ha kylleng ki bynta jong ka jylla kiba la kot sha ka 3,625 klur tyngka bad dang shen ka sorkar ka la ïoh sa 260 klur tyngka na ka DONER Ministry na ka bynta ban pynitynnad shuh shuh ïa ka thain Sohra.
U Myntri Rangbah u la ïathuh ruh ba ka thong jong ka sorkar jylla ka long ruh ban pyndonkam da kine ki homestay ha ka por ba don ka National Games khlem da donkam shuh ban shna ïa ki Games Village kumba leh ha kiwei kiwei ki jylla haba wan ka National Games.
U la ong ruh ba ynda la dep lei lei sa ka Umroi Airport ha shwa u 2027 kan nang wanrah shuh shuh ka jingkylla namar ki liengsuin kiba heh kin lah ban wan kamai na kylleng ki bynta jong ka jylla sha kane ka jylla.
Ha kane ka sngi u Myntri Rangbah u la sam ruh ïa ki khusnam bapher bapher sha ki nongpynïaid ïa ki jaka jngohkai, nangta sha kito kiba buh ïa ki jaka sah na bynta ki nongjngohkai pyrthei bad kiwei kiwei.
La ïoh ruh ïa ka jingkren na u Dr. Vijay Kumar D., IAS, Commissioner & Secretary ka tnad Tourism nalor kiwei kiwei.