Shillong Risaw 14: U CEM ka KHADC u Bah Pynïaid Sing Syiem ha ka sngi Nyngkong u la pyllait paidbah ïa ka kot ba la thoh da u Bah Phrikshon Kharshïing uba dei uwei na ki nongthoh kot Khasi ba la rim u la pynmih sa kawei pat ka kot kaba 12 ka jong u kaba u la ai kyrteng “Ka Saiñ Pyrkhat U Khasi bad Ki Dak Thoh Ha Ka Ktien Khasi. Ïa kane ka kot la pyllait hapoh ka conference hall ka KHADC ha kaba kane ruh kadei ka Sngi kaba kyrpang ïa ka ïing ka sem u nongthoh naba kadei ka Sngi kha jong I kurim jong u.
Ha kaba ïadei bad kane, haba kren kum u kongsan u CEM u la ong ba ka council ka dap da ka jingkmen ba u Bah Phrikshon u la mih shakhmat ha ka thoh ka tar. U la ïathuh ba naduh u snem 1952 ka council ka la ïakren ban pynlong aiñ ïa ki riti dustur, ka synshar ka khadar, ka tem ka put, ka rwai ka siaw, ka kup ka sem, ki ktien shnat Khasi bad kiwei kiwei.
Na ka liang u CEM u la ïathuh ba ka Council ka la pyrshang ban khot ïa ki riew shemphang ne ki Scholar halor ka thoh ka pule ban pynskhem hapoh ka aiñ ïa ka thoh ka tar ba kin wad bniah ha ki 20 tylli ki area kiba long kiba donkam bha ban pynrung hapoh ka aiñ ne codify.
Shuh shuh u la ong ba ka jingmih shakhmat kum jong u Bah Phrikshon kan nang pynkhlaiñ bad kyntiew ïa ka ktien bad ka thoh ka tar bad ka council kan thied haduh 20 tylli ïa kane ka kot ban buh hapoh ka Library ka KHADC kaba dang shudep plie bad ka long ruh kaba kloi ban pynphriang ïa kane ka kot ha baroh ki District ka Khasi bad Jaiñtia kumjuh ruh ha ki shnong kiba dang hab hapoh ka jingkhmih ka KHADC.
Katba u Bah Phrikshon Kharshïing haba ai jingkren u la pyntip ba kane kadei ka kot kaba 12 kaba la pyllait kaba dei kaba la thoh ban pynneh pynsah ïa ki riti dustur kiba long kiba donkam bha ha kane ka por bad ka pateng kaba mynta.
“Ka kam thoh kot kadei ka kam kaba ïap ja namar kane ka pateng mynta ym don shuh kiba thied bad ba pule, hynrei namarba skhem ka jingmut ban pynneh pynsah ïa ka riti dustur ngin bteng beit ban thoh ïa ki kot,” ong u Bah Phrikshon.
Haba ïathuh ba ka dor jong ka kot kadei T. 100 kawei, u Bah Phrikshon u la kyrpad ïa ki paidbah khamtam kiba samla pule ban thied bad ban long kiba smat ban pule khnang ba kin tip shaphang ki riti dustur bad ki ktien jong ki shnong Khasi.
Ïa ka jingïalang la pynïaid da u Bah Raphael Warjri, la kren pdiang da ka Dr. Cherry Kordor, la kren lyngkot shaphang ka kot da ka Dr. Ailynti Nongbri nalor ka jingdonlang kiwei kiba la shah khot sngewbha.
Ha kane ka sngi la donlang ruh u Deputy CEM u Bah P N Syiem bad u Bah Victor Ranee EM ka Arts and Culture ka KHADC nalor u Bah Bindo M Lanong, u Chairman ka KHADC u Bah Lamphrang Blah nalor kiwei pat kiba la wan ban synranlang ïa u nongthoh nalor ka ïing ka sem jong u bad i kurim jong u.
