Pyllait paidbah ka SSCM ïa ka “Thiar Lum Jingtip” (Newsletter) ba shisien lai bnai

Mawkyrwat, Jylliew 10: Ka Sngap Syiem College Mawkyrwat (SSCM) ha ka 8 tarik u bnai Jylliew, 2022 ka la pyllait paidbah ïa ka “Thiar Lum jingtip” kaba shisien lai bnai ba nyngkong kaba kyrteng, “The Sngap Syiem College Newsletter”.
Ïa kane ka kot la pyllait paidbah da u kongsan u bah Renikton Lyngdoh Tongkhar, MLA Mawkyrwat Constituency, uba long ha ka juh ka por kum u Myntri ka Sokar jylla uba dei peit ïa ka tnad umbam umdih (PHE), ha ka jingïadon ryngkat jong u Dr. K.D. Ramsiej, President, Governing Body, u Rev (Dr) S.I. Iawphniaw, Vice President, Governing Body, u Dr. K.K. Nongsiej, In-charge Principal ka Sngap Syiem College Mawkyrwat, u bah Carness Sohshang, MDC jong ka thaiñ ha ryngkat bad ki dkhot jong ka Governing Body bad ki nonghikai jong ka kolej.
U Kongsan ha ka jingkren jong u u la ai khublei ïa ka kolej bad ïa ki nongpynïaid jong ka baroh kiba la trei shitom bad ha kajuh ka por u la ai mynsiem ïa ki nongtrei jong kane ka kolej ban kin nang ïaid shaphrang ha ka ban ai ka jingshakri na ka bynta ki samla pule jong ka dong ka thaiñ khnang ba ki samla jong ka dong ka thaiñ kin lah ban nang kiew na kawei ka kyrdan sha kawei pat ha ka jingnang jingstad bad khamtam eh ha ka akor ka burom.