SHILLONG, Naitung 18: Ka kynhun ïalehkai phutbol jong ka Langsning Football Club (kaba la tip ruh da ka Langsning Sports Club) ha ka 17 tarik Naitung, 2025 ka la ïoh ban pyllait paidbah ïa ki Jersey ba ka klob kan phong ha kane ka samoi ïalehkai ban wan jong ka Shillong Premier League 2025-26.
ïa kine ki jersey la pyllait paidbah ha ka jingïalang kaba la pynlong ha Jaïaw Langsning Community Hall, ha kaba la wan Kongsan da u Bah Paul Lyngdoh-Myntri ka tnad jngohkai bad uba dei ruh u MLA ka thaiñ, ha ka jingïadonlang u President jong ka klob u Bah Banteidor Lyngdoh-uba dei ruh u MLA ka Mawkynrew, Secretary ka Shnong, ki nongkitkam jong ka seng Samla bad kumjuh ruh ki nongkitkam jong ka klob.
La ïoh ruh ban pynithuh ïa ki rangïalehkai jong ka klob ki ban mih madan ha kane ka Shillong Premier League 2025-26 ka ban sa long shen.
Ha kane ka sngi la ïoh ruh ban batai lyngkot shaphang ka jingïaid lynti jong ka Seng Samla Langsning da u Secretary ka Seng Samla shnong . Ka la don ruh ka jingsam ïa ki tracksuit sha baroh ki player bad ki coaching staff jong ka Langsning FC.
Haba ai jingkren kum u Kongsan u Bah Paul lyngdoh u la ong, “Long shlur ban phohsniew, tangba ka jingphohsniew kam dei ban long kumjuh, Ngi dei ban rah shakhmat ïa ka thong jong ka jingphohsniew bad donkam ban buh sa ki mawnongrim ban pynshong ïa kita ki jingphoh sniew”.
Shuh shuh u la ong ba kaba khongsan eh ka dei ban don ka jingïatreilang kawei kum ka kynhun da kaba kdew ba “Kam don kano kano ka football club kaba ong Ngi don ïa u rangïalehkai ba kynsai bad Ngim donkam ïa ki 10 ngut kiwei pat”.
Khyndiat, ka Langsning FC kadei ka klob trai ri jong ka Jylla Meghalaya kaba la shem bad seng ha u snem 1974; ïa ka kyrteng “Langsning” la shim na kawei ka jaka ha Shillong kaba la tip da ka Jaiaw Langsning, bad kiba bun ki nongïalehkai ki dei ki rangïalehkai trai ri.
