Pyllait paidbah ka FIFA ïa ka Trionda, ka bol na bynta ka World Cup 2026

USA, Risaw 04: Ka FIFA ka la pyllait paidbah ïa ka bol ïalehkai ba thikna, ïa kaba yn sa pyndonkam ha ka lympung World Cup 2026, kaba pynïasoh lang ïa ki jingshna ha ka juk stad kaba mynta bad ka jingpynwandur ba bñiah kum ka jingpynpaw ïa ki lai tylli ki ri kiba ïadon bynta lang—ka ri America, ka Mexico bad ka Canada.
Sa shi sien ïa kane ka bol, kaba la jer kyrteng da ka ‘Trionda’, la shna pynwandur biang da ka kompeni shna bol kaba na Germany ka Adidas, kaba ju pynbiang ïa ki bol na ka bynta kane ka lympung naduh u snem 1970.
“Nga sngewkmen bad sngew sarong ban aiti ïa ka Trionda,” la ong u President ka FIFA u Gianni Infantino ha ka jingïalang pyllait paidbah ïa katei ka bol ha nongbah New York ha ka sngi Palei.
Kane ka World Cup kaba nyngkong eh ban pynlong da lai tylli ki ri, ha kaba ki don 48 tylli ki kynhun ki ban ïashim bynta, ka la ai mynsiem ban jer ïa ka kyrteng bad ka jingshna pynwandur ïa ka bol ha ki lai tylli ki rong, ba kynthup ïa ka rong saw, rong blue bad rong jyrngam.
Ki dur na kawei pa kawei ka ri—u sla dieng maple na Canada, ka khlieng na Mexico bad ki khlur na ri America ruh ki paw ha kane ka bol, ryngkat bad ka dur lai dong kaba pynpaw ïa ka jingïatylli jong ki lai tylli ki ri.
ïa kane ka bol la shna pynwandur ruh da ki buit ka juk stad lane ki kor teknoloji, ha kaba la shon ryngkat lang ki kynja dur ka ban kham pynsuk ban kem ïa ka bol lada jia ba ka jhih lane ha ka por ba sngem ka madan haba ïalehkai.
La pyndait ruh ïa u kynja chip ka ban lum jingtip ïa ka rukom ïaid jong ka bol, bad phah ïa ki jingtip sha ka VAR ban kham suk ka bishar lada don ki khep kiba u referee um lah ban rai.
Kane ka jingpynlait paidbah ka long sa kawei pat ka sienjam ha ka jingkheiñ por ïa ka World Cup ha North America, ka ban long ha ka 11 tarik u Jylliew haduh ka 19 tarik u Naitung jong u snem ban wan.
Dang shen ha u bnai (26 tarik Nailur), ka FIFA ka la pyni paidbah ïa lai tylli ki mascot jong kane ka FIFA World Cup 2025. Kine ki maskot ki kynthup ïa u Maple ba mihkhmat ïa ka Canada; Zayu jong ka Mexico; bad u Clutch, jong ka America.
Ka FIFA ka la pynpaw ïa ka shap (logo) ba thikna jong kane ka lympung phutbol ba shongshit tam ha ka 17 tarik Jymmang, 2023, ha ka jingïalang kaba la long ha Griffith Observatory ha Los Angeles. Kane ka shap ka pyni ïa ka dur kaba shai bha ïa ka khusnam ba shisha jong ka FIFA kaba la shon ha khmat eh. Kaba kham pawnam ka long ba kane ka dei ka sien kaba nyngkong eh ha kaba la shon ïa ka dur khusnam jong ka FIFA World Cup Trophy ha ka shap.
Ka FIFA ka la sdang ïa ki rukom die tiket lyngba ki bynta jong ka online, ha kaba palat 4.5 million ngut ki nongkyrshan na ki 216 tylli ki ri ki la pynrung lypa ïalade na ka bynta ki tiket.
ïa ka jingpynïakap ïa ki kynhun ha ki Group bapher bapher ki ban ïakhun yn pynlong ha Washington ha ka 05 tarik Nohprah.
Ka World Cup kaba ladep ha Qatar, la rah da ka Argentina hapoh ka jingïalam jong u Lionel Messi.