Pyllait ki Pulit ïa ka Video ba bthah u Military Commander ka HNLC ïa u dkhot ban pynbthei IED

Shillong, Lber, 21: Ki Pulit jong ka Ribhoi District ha ka sngi Palei ki la pyllait paidbah ïa kawei ka video ba la ring dur ïa ka jingïakren da ka mobile phone hapdeng u Military Commander ka seng kieng atiar Hynniewtrep National Liberation Council (HNLC) uba la tip kyrteng kum u Sanbor Pala uba la bthah ïa uwei na kiba la shah kem ha ka jingïoh kurup ïa u bom IED ha Ribhoi dang shen.
Katkum kane ka video la sakhi ba u Sanbor Pala u la pan jingpynshai na u dkhot ba la phah ban pynbthei ïa u bom IED ha kaba u dkhot u la kyntait ban leh ïa kane ka kam bymman da kaba ai daw ba ka mynsiem jong u kam ailad satia ïoh ba ka jingbthei jong u bom kan pynngat kylla ïa ki jaidbynriew lajong.
Nalor kata, ha ka jingïakren u dkhot u la kam ba u ladep bret ïa ka tiar, ïa kaba la suba ba u lah ban dei u bom IED ba ladep pynkhreh lypa ban pyntbthei ha ka jaka ba la thmu.
Shuh shuh, u Military Commander ka HNLC u la bthah ïa u dkhot ban sangeh shwa ïa mynta shipor ban leh ïa ki kam pyntriem namarba ki Pulit ki dang pynlong ka jingthwet kaba jur ïa ki briew kiba donkti ha ka jingpynbthei bom IED ha Them Iewmawlong ha ka miet 9 tarik mynta u bnai.
U Superintendent of Police ka Ribhoi u Jagpal Singh Dhanoa ha u kyrwoh ba la phah sha ki lad pathai khubor u la ïathuh ba ki Pulit kiba la pynlong ïa ka jingtohkit halor ka case ba la register ha Nongpoh Police Station hapoh ka Section 120B/121A Indian Penal Code bad pule lang bad ka Section 10/13/18 UA(P) Act bad ka Sec 5/6 Explosives Substance Act ki la kem sa arngut ki briew.
Ha ka jingtohkit, ki Pulit ki la lap ba ka seng HNLC ka donkti ban pynngop ïa ki samla kiba lui lui ban leh ïa ki kam pyntriem da kaba buh hakhmat ïa ka thong ban pyntyllun shakhmat ïa ka jingdawa pisa.
Ki Pulit ki la pynlong ruh ïa ka jingtohkit kaba bniah ban lap ksai la ki don neem ki briew kiba la siew pisa sha kane ka seng kieng atiar bad ki Pulit ki la maham ruh ba lada kino kino ki briew ki don jingïadei kin shah kem bad shah tohkit bad yn pynngat beit hapoh ki kyndon jong ka Unlawful Activities Prevention Act.
Shuh shuh u SP u la ïathuh ba ki Pulit ki la register case ha kaba ïadei bad ka jingsieh ïa ka lama jong ka seng HNLC ha surokbah National Highway ha Ribhoi District ha u Nailar, 2023 bad ïa kane ka case la register ha Nongpoh Police Station hapoh ka Section 120B/121A jong ka Indian Penal Code bad pule lang ruh bad ka Section 10/13 jong ka UA(P)Act.
Ha kajuh ka por, une u heh Pulit ka Ribhoi u la ïathuh ba ïa ki kam runar jong ka HNLC la tohkit bniah lyngba ka Social Media bad na ka VO1P. U SP u la kyntu ïa kino kino ki briew lada ki ïoh phone call na ka HNLC ki dei ban pyntip mardor sha ki Pulit bad ban khang noh ïa ka dur bad ïa u nombar ba la ïakren.
U SP u la ong ba la lada lap ïa kino kino ki briew kiba don jingïadei bad ka seng HNLC yn kem bad ban pyngngat ha ki kyndon aiñ kiba eh.