Mairang, Lber, 23: U Deputy Commissioner (Supply) ka Eastern West Khasi Hills District u pynbna paidbah sha baroh ki longïing jong ka District, ba la pyllait paidbah ïa u khaw jong ka National Food Security Act 2013 bad u khaw hapoh ka scheme PMGKAY, jong u bnai Lber 2022 lyngba ki dukan rashon.
Ïa u khaw hapoh jong ka NFSA 2013 PHH bad AAY la bthah ban sam katkum ka scale ba la buh da ka Sorkar, kata ka National Food Security Act, PHH – 5 kilo shi khlieh briew ha ka dor 3 tyngka shi kilo, AAY – 35 kilo shi card ha ka dor tyngka shi kilo, Non- NFSA – 7.215 kilo shi card ha ka dor 13 tyngka shi kilo. Pradhan Mantri Garib Kalyan Awaas Yojana (PMGKAY), PHH – 5 kilo shi khlieh briew khlem da shim pisa, AAY – 5 kilo shi khlieh briew khlem da shim pisa.
Ym bit ban ai duna ne ot na ka bhah ba la buh ne mang da ka sorkar, ha kaba ïadei bad ka jingsam ïa uno uno u marbam ba la ai lyngba ka shkim PMGKAY, NFSA bad Non- NFSA. La bthah ruh ïa baroh ki FPS dealer ba kim dei ban pynduh khaw ïa kito ki nongbam ki bym pat don ïa u Aadhaar Card bad ïa kito kiba la pynjah ïa ki ration card jong ki.
Ïa ka bai kit bad bai kali ban pynpoi ïa kine ki marbam hapoh jong kitei ki lai tylli ki skhim, yn bei pisa da ka sorkar sha ki Wholesaler ne Dealer kumba ju leh na ka por sha ka por bad ha ka jaka sam khaw, la bthah ba baroh kin ieng la kumno kumno shi mitar ka jingjngai iwei na iwei pat ha u laiñ. Baroh ki nongshim rashon kin hap ban deng ïa ki jingda dur khmat (Mask) ha ki jaka sam khaw.
Shuh shuh, u Deputy Commissioner (Supply) ka Eastern West Khasi Hills District, u pyntip ba la pyllait ïa ka umphniang sharak na ka bynta u bnai Lber 2022 ha ka jingthew kaba 2.71 litar shi ïing, na ka bynta kito kiba la ring ding elektrik bad 3.00 litar na ka bynta ki shnong ne dong, ki bym pat ring ding elektrik bad ka dor ka long katkum ka jingpynbeit jong ka Vigilance Committee jong ki shnong bapher bapher. Lada lap ïa kino kino kiba pynkheiñ ïa kitei ki kyndon haneng, yn pynshitom katkum ka aiñ bynrap shuh shuh ka kyrwoh u Deputy Commissioner.
