Pyllait ka SSA ïa ka thup kynhun bad ka prokram na bynta ka Champions Cup ban sdang ha ka 24 tarik Naiwieng

Shillong, Naiwieng 14: Ka Shillong Sports Association ka la pynlait paidbah ïa ka thup kynhun ba la pynïakap ryngkat bad ka prokram ïalehkai na ka bynta ka Champions Cup 2025 kaba nyngkong, kaba la pynkhreh ban sdang ha ka 24 tarik u Naiwieng.
Ka jingmut jong ka SSA da kaba pynlong ïa kane ka lympung ka long ban pynïasoh lang ïa ki lahduh jong ki san tylli ki kyrdan (division) ïalehkai phutbol shynrang jong ka synjuk ha kawei ka lympung kaba kham kloi bad kaba itynnad. Ïa ki 10 tylli ki klob kiba lah ban ïakhun la phiah ha ki ar tylli ki Group kaba mar san tylli ki kynhun, ha kaba kin hap ban ïa aireng markylliang shisien, bad ar tylli ki kynhun kiba wan hakhmat duh na kawei pa kawei ka Group kin ïohrung sha ka semifinal.
La khmihlynti ba kane ka lympung kan long kaba shongshit namar baroh 10 tylli ki klob kin ïabeh ïa ka burom kaba ïaid ryngkat bad ka nam ‘Champions of Champions bad kumjuh ruh ka khusnam pisa kaba heh bha kaba T.8 lak na ka bynta ka nongjop, ka ban pynlong ïa ka kum kawei na ki lympung phutbol kaba heh ka khusnam pisa ha kano kano ka jaka ha Meghalaya.
Ka SSA kan sa sdang ïa kane ka lympung ynda la kut ka First Division kaba dang ïaid shakhmat. Ka Nongkseh bad ka Meghalaya Police ki ladep pynthikna lypa ïa ka jaka kum ki ar tylli ki kynhun ba kynsai (Top 2) ha kane ka Division, watla ym pat lah ban rai ïa ka nongjop.
Ka Group A ka kynthup ïa ka lahduh jong ka Shillong Premier League ka Langsning, ka Mylliem Lum (lahduh haka 2nd Division), ka Umlyngka (Third Division runners-up), ka Mawkasiang (lahduh haka 4th Division) bad ka kynhun ba wan ba ar ha ka First Division.
Nangta ka Group B ka kynthup ïa ka Shillong Lajong kaba wan ba-ar ha ka SPL, ka Laitkyrhong (2nd Division runners-up), ka Mawkriah West (Lahduh ha ka 3rd Division), ka Mawlynrei (Fourth Division runners-up) bad ka lahduh ha ka First Division.
Kane ka lympung kan sdang da ka jingïalehkai ba nyngkong hapdeng ka Mawkasiang pyrshah ïa ka Mylliem Lum ha ka por 1baje nohphai sngi ha ka 24 tarik u Naiwieng, katba ka Langsning kan ïakhun pyrshah ïa ka Umlyngka ha ka por 4 shiteng janmiet kham hadien ha kajuh ka sngi. Ka Semifinal kan long ha ka 09 bad 10 tarik u Nohprah bad ka phainal kan long ha ka 13 tarik u Nohprah.
ïa ka trophy la plie paidbah hynnin ka sngi Palei ha ka jingïalehkai phainal jong ka SSA Super Cup 2025 da u Myntri Rangbah ka jylla u Conrad K Sangma ha ryngkat ka jingïadon lang u Myntri ka tnad ïalehkai u Wailadmiki Shylla bad ki kapten bad ki nongmihkhmat jong ki 10 tylli ki klob.
Ban pynïahap khyndiat ïa ka kyrdan ïalehkai hapdeng ki klob, ka SSA ka la ailad ïa ki kynhun na ka Second, Third bad Fourth Division kiba ïashim bynta ban soi da kaba shu shim wai (on loan) haduh san ngut ki nongïalehkai na ka bynta kane ka lympung.