Shillong, Jymmang 4 : Na ka 200 klur tyngka kaba la mang ban pyntreikam na ka bynta ki projek bapher bapher ha ka nongbah Shillong ba kan long ka Smart City ka sorkar pdeng ka la pyllait 140 klur tyngka bad na ka sorkar jylla la pyllait 55 klur tyngka, ïathuh u myntri ka tnad pynroi sor u ma Sniawbhalang Dhar.
Kine ki projek bapher bapher ki dei kum ka jingtei ïa ka ïew Laitumkhrah, ka ïew Polo, ka Anjalee Parking lot, Motphran Parking lot, ka jingpynkhuid wah Umkhrah bad ter ter. “ Ngi la mang ruh 80 klur na ka bynta ban shna ïaki surok kiba hap hapoh ka Municipal. Ka Meghalaya ka dei kawei na ki jylla kaba biang tam ha kaba pyntreikam ïa ka smart city projek” ong u ma Sniawbha.
“ Mynshwa ngi poi haka kyrdan ka 97 hynrei mynta ngi la kiew sha ka kyrdan 69” ïathuh u ma Sniawbha. Ha kaba ïadei bad ka jingpynkhreh ban tei ïa ka Multipurpose Mall ha ka jaka jongka ophis MTC, Police Bazar ïa kane ruh la dep aiti sha ka kompani ban tei ïa kane ka ïew bah. Ka kompani ka dang hap ban leh ïa ki test ïa ka khyndew ha kane ka jaka bad tang shu la ïoh ïa ka kaiphod kin sa sdang noh ïa kane ka projek.
