Shillong, Jylliew 22: Ka sorkar jylla ka la pyllait ïa ka Season 3 jong ka Meghalaya Grassroots Music Project (MGMP) ha ka prokram kaba la long ha ka janmied ka World Music Day, kaba mynta kaba ai kyrteng da ka Chief Minister’s Grassroots Music Programme (CMGMP).
Ïa kane ka prokram la pynlong ha Lariti Main Auditorium, Shillong, ha kaba u Myntri Rangbah ka jylla u Conrad K. Sangma u la long u kongsan ha ka jingïadonlang u Myntri ka tnat Tourism u Bah Paul Lyngdoh kum u Symbud kongsan ha ka jingïadonlang ki artist, ki heh sorkar, ki nongshong shnong bad ki paidbah kiba ieid ïa ki jingrwai.
Ha ka jingkren kum u kongsan u Myntri Rangbah u Conrad K. Sangma u la pynpaw ïa ki jingdonkam ba ki samla ki dei ban ieid ïa ki jingrwai. U la pynpaw ruh ïa ki jingeh ba la mad da ki riew ieid jingrwai ha kine ki snem ba la leit ban pynlong ïa ki concert la jong naba kim ïoh ïa ki tiar tem kumba long ha kane ka juk kaba mynta.
“Ngi kwah ban ai lad ïa ki samla ba kin tem ha ki rynsan, ba kin ïoh ruh ki jingithuh kaba kidei hok ban ïoh,” u la ong.
U Myntri Rangbah u la pynpaw ruh ïa ka jingsdang ka MGMP da ka jingmang pisa kaba long T. 3.5 klur bad ka jingdon ki 2,500 ngut ki artist ha ka snem kaba nyngkong ha kaba kane mynta ka la kiew sha ka T. 69 klur ka prokram kaba la ai ka jingkyrshan ïa palat 5400 ngut ki artist bad ka jingdon kumba 38000 ngut kiba tem ha ki rynsan ha ka kylleng ka jylla.
Ha kane ka sngi u Myntri Rangbah u la pynlait ruh ïa ki artylli ki kot kaba kynthup ïa ka CMGMP Rock and Tourism Festival Booklet bad ka Council Technology Booklet.
U la pynbna ruh ha tang ha u snem ba la dep ka jylla ka la ïoh ban pynlong kumba 7 tylli ki concert ha ki 13 sngi ha kaba la wan ban shim bynta ruh da kumba 3.86 lak ngut ki briew ha kaba na kane ka la pynmih ïa ka khajna sha ka jylla kumba T. 133.42 klur.
Ha kane ka sngi la ïoh ruh ka jingkren na u Myntri ka tnat Tourism u Bah Paul Lyngdoh, uba la kren bniah bha halor ka CMGMP.
Ha kane ka sngi la ïoh ruh ka jingkren pdiang na u Dr. Vijay Kumar D., Commissioner and Secretary ka tnat Tourism.
Ka MGMP Awards Ceremony, ka dei ka prokram kaba ithuh ïa ki artist na Khasi, Jaiñtia, bad Garo Hills. Ki nongjop ba kynthup ïa Bending Waves, Magnificent Obsession, Strange Origin, Neil Umwi, Vanessa Suchiang, Snam Rangsa, nalor kiwei. La ai ruh ïa ka jingithuh kaba kyrpang ïa Mayan Khasi, Bachin Yana Momin, bad Chevinia kum ki nongtem kiba dangshen, nangta Tekisha Shabong bad Khongsam hapoh ka “The Sound of Music” awards kiba dei ruh kiba duna ha ki dkhot met, Dan & Zac bad Ricky Dawa kum ki fan favourite, bad Eno Kharkongor kum Best Gospel Artist. La sam ruh ruh ïa ka pisa kaba dei ka khusnam kumba T. 10,00,000.
