Pyllait ka sorkar 72 klur tyngka ban siew bai jaka ban pynheh ïa ka Kad Liengsuiñ ha Umroi

Shillong, Jylliew 16 : Ka sorkar ka la pyllait 72 klur tyngka ka pisa na ka bynta ban siew bai jaka sha ki trai jaka kiba ka sorkar kala thied haduh 6 acre na ka bynta ban pynheh ïa ka Kad Liengsuin Shillong kaba ha Umroi. Kane ka jingpynheh ka long khamtam ïa ka surok ban her bad hiar ki liengsuiñ ba heh.
“ ïa ka pisa la dep pyllait sha u Deputy Commissioner na ka bynta ban siew ïa ka bai jaka” ïathuh u Symbud Myntri Rangbah ka jylla uba dei peit ïa ka tnad Transport u Ma Sniawbhalang Dhar.
U la ïathuh ba la khot tender ruh na ka bynta ban pynheh bad pynjlan ïa kane ka jaka her bad jaka hiar ki liengsuiñ ba heh.
Ka Kynhun Myntri kaba ïa kynduh ha ka 4 tarik Jylliew ka la mynjur ban thied ïa kane ka jaka haduh 6 acre kata nalor ka 11.75 acre kaba la don lypa khnang ban ïoh pynheh ïa ka jaka her bad jaka hiar ne ka runway. Na kane ka jaka 4.3 acre ka dei ka jaka jong ki shipai.
La thaw ruh ïa ka Committee ba la khlieh da u Deputy Commissioner na ka bynta ban ïakren ïa pynbeit bad ki trai shnong halor ka dor ka mur jong ka jaka khnang ban ïoh siew dep noh ïa ki.