Shillong, Ïaiong 05 : U Myntri ka tnad Pule Puthi ka sorkar jylla, Bah Lahkmen Rymbui ha ka sngi Ba-ar u la pyntip ba ka sorkar ka la dep ban pyllait haduh 60 klur na ka bynta ban siew ïa ka tulop jong ki 12hajar ngut tam ki nonghikai SSA.
Haba kren bad ki lad pathai khubor, u Myntri u la ïathuh ruh ba ïa katei ka pisa kaba dei na bynta ar bnai ka tulop ba dang sah ki la dep ban pyllait naduh ka 29tarik u Lber. La ïathuh ruh ba na ka tnad ki la dep ban leh ïa kaba donkam na ka bynta ban pynpoi pat ïa ka sha ki distrik bapher bapher.
Na ka liang u Myntri u la pyntip ba ka sorkar pdeng shen kan sa pyllait sa 68 klur tyngka na ka bynta ban siew pat ïa ka tulop ba dang sah jong kitei ki nonghikai.
Kumban shu pynkynmaw, ki nonghikai SSA dang shen ki la pynpaw ba la san bnai mynta ki khlem pat ïoh satia ïa ka tulop kaba la buh jingeh bha ïa ki ha ki liang baroh. Ha ki bnai baladep, ki nonghikai SSA ki la pynlong ruh ka jingïakhih da kaba mih ha surok ban dawa ïa ka tulop jong ki.
