Pyllait ka sorkar 122 klur ban siew tulop 4 bnai ïa ki nonghikai SSA

Shillong, Naitung 21 : Ka sorkar MDA mynta ka sngi ka la pyllait 122 klur tyngka ka pisa na ka bynta ban siew ïa ka tulop jong ki nonghikai SSA kiba don 12,541 ngut na ka bynta saw bnai shwa bad ïa kaba sah shibnai yn sa siew tang shu pyllait ia ka tulop na Delhi. Hadien ba ka sorkar ka la ai da ki jingthoh sha ki nongïalam jongka seng Meghalaya SSA Schools Assocation (MSSASA) kumta ki nonghikai ki la rai ban weng noh ïa ka jingïakhih shong kyllaiñ myngngor ba khlem buh por jongki naduh mynta hi ka miet.
ïa kane ka rai la shim hadien ba u Symbud Myntri Rangbah ka jylla u bah Prestone Tynsong la khot ïakren ïa ki nongïalam ka MSSASA ha ka jingïadon lang u Addl. Chief Secretary uba dei khmih ruh ïa ka tnad pule puthi u bah D.P Wahlang IAS lem bad kiwei ki ophisar na ka tnad pule puthi.
“ Nga la pyntip sha ki ba ka sorkar kan pyllait ïa kane ka tulop jongki bad ïa mynta yn pyllait shwa tang saw bnai bad ïa kaba sah shibnai yn sa pyllait tang shu ïoh ïa ka pisa na ka sorkar pdeng” ong u Symbud Myntri Rangbah.
ïa kane ka jingthoh ba la ai da ka sorkar la aiti ha u President ka MSSASA u bah Aristotle C Rymbai kaba la batai shai ba ka sorkar kan pyllait 44 klur na ka tnad pule puthi bad 78 klur na ka Contingency Fund jongka sorkar jylla ïa kaba yn sa pynphai pat tang shu ïoh ïa ka pisa na sorkar pdeng.
ïa kane ka pisa ba la pyllait yn sa thep sha ka Account jongka SSA hangne ha jylla la kumno kumno ruh hapoh ka 27 tarik Naitung.
Halor kane ka jingsei soh jongka jingïakren na ka liang u Symbud Myntri Rangbah u la kyntu ruh ïa ki nonghikai SSA ba kin sngewbha ban weng noh ïa ki jingïakhih jongki khnang ba kan ym ktah jur than ïa ki khynnah skul.
Ha kaba ïadei bad ka jingdawa ban pynkiew ïa ka tulop, u Symbud Myntri Rangbah u la ïathuh ba ïa kane ka kam yn sa pyndep da ka State Education Commission namar ïa kane la thung khnang ba kan bishar bniah, tih bniah ban ïoh pynbeit ïa ki jingduna bad bakla ha ka tnad pule puthi naduh ka rukom ai jinghikai, ka jingkiew jongka pule puthi, ka jingbha ki skul, ka jingpynbeit ryntih ïa ka tulop jong ki nonghikai naduh ki lower, ki upper bad haduh ki secondary. Kane ka Commission kan pynkhreh ruh ïaka polisi treikam jongka tnad pule puthi. Kane ka long ka sien kaba nyngkong eh ban thung da ka Commission ban bud dien thik pa thik bad bin pa bin khnang ba yn lah ban pynbeit shisyndon ïa kine ki kynrum kynram hapoh ka tnad pule puthi, ong u Symbud Myntri Rangbah.
“ ïa kane ka jingpynkiew tulop yn sa bishar bniah da ka Commission namar ka jingpynkiew kan long ïa baroh ki nonghikai ha ki kyrdan jinghikai bapher bapher. bad ïakiwei kiwei ki kam ba sahteng jongki nonghikai ruh” ong u Symbud Myntri Rangbah.
Ban kiar na kaba pynslem siew tulop ïa ki nonghikai SSSA ha ki por ban wan, u Symbud Myntri Rangbah u la ïathuh ba la rai ruh ban ïakren bad ka sorkar pdeng na ka bynta ban pyllait ïa ka tulop shisien lai bnai ym shuh kumba long mynta ban sah kut da ki bnai lynter. “ Kumta halor kane ma nga bad u Myntri Rangbah ka jylla u Conrad K Sangma ngin leit sha Delhi lashai ka sngi ban leit ïa kren bad ki heh ka tnad pule puthi ka sorkar pdeng bad kumjuh ruh bad ka tnad kam pla tyngka jongka sorkar pdeng ban pyllait ïa ka tulop ki nonghikai shisien lai bnai. Kane kam mut tang sha ka jylla Meghalaya hynrei sha baroh ki jylla hapoh ka ri India. Namar kiwei ki jylla ruh ki mad ïa kajuh ka jingeh da kane ka jingpynslem ban pyllait ïa ka tulop na Delhi bad ngi kyrmen ba ka sorkar pdeng ruhkan sngap ïa kane ka jingkyrpad jong ngi” ong u bah Prestone.
Haba la kylli hato ka jingbyrthen jong u Myntri ka tnad pule puthi u ma Lahkmen Rymbui ban leh tyngeh ïa ki School Managing Committee (SMC) la ïakren ne em mynta ka sngi, u Symbud Myntri Rangbah ula ong ba ka por ka la dei eh ïaki SMC ba kin shim lang ka jingkitkhlieh namar kiba bun ki skul ki dei ki skul shimet ne jong ki kynhun niam ne shnong.
“ Ki SMC ruh ki dei ban sngewthuh ïa la ka jong ka jingkitkhlieh namar tang ka sorkar marwei kam lah ban pynbeit ïa ka kam. Namar lada kwah ban kiew ka jingnang jingstad donkam ka jingïatrei lang na baroh ki liang. Kumta ki SMC ki don ka jingkitkhlieh halor kane ban ïohi ïaka jingkylla ha ka pule puthi” ong u bah Pretone.
Halor ki jingkynthoh ki nongïalam TMC u bah Prestone u la ong ai kin kren lai phewjait ne ar ne lai sur ruh ngim salia namar ka kam jongngi ka long ban shakri bad peit ïa ki jingeh ïa kaba ngi la pyrshang katba lah ban pynbeit ïa kita ki jingeh. “ Ngim salia ïaki jingkynthoh namar ka thong jong ngi ka long ban pynbeit ïaki jingeh kloi katba lah” ong u bah Prestone.