Shillong, Risaw 27: Ka Rotary Club Shillong Heritage da ka jingsarong ka la pyntip ba ka la pyllait ïa ka kali ba kit ïa ka synduk met ïap (hearse van) bad ka la ong ba ïa kane ka kali la aiti na ka bynta ka jingthmu ban ai ka jingshakri ïa ki paidbah.
Ka jingpyllait ïa kane ka kali kadei ruh kaba la don hapoh ka jingmut da u President, Rtn. Vikash Chokhani. Ïa kane ka jingpynlait ïa ka kali ka la long hapoh Pinewood Hotel bad la wan ban pyllait ruh da ka kongsan ka kong R.M. Kurbah, ka Deputy Commissioner ka East Khasi Hills District, ha ka jingdon ryngkatlang jong ki dkhot ka club.
Kane ka projek kaba kongsan la lah ban pynlong kam lyngba ka jingnoh synniang ba sbun mynsiem jong ka Kamakhyalal Bajoria Charitable Trust, kum ka dak ban sah kynmaw ïa ka Bhagwati Prasad Bajoria.
Kane ka kali kit synduk metïap kan ai ka jingshakri ïa ka imlang sahlang da kaba pynthikna ba ka kit ka bah kan long ha ka por ba ki nongshong shnong ki donkam.
