Pyllait ka Nongkseh SS&CC ïa ki jersey ïalehkai na bynta ka Meghalaya State League

Shillong, Ïaiong 07 : Ka Nongkseh Sports Social and Cultural Club hapoh ka jingïalam jong u President, Bah Daniel Thangkhiew ha ka sngi Ba-ar ki la pyllait paidbah ïa ki jersey, ki track-suit bad kumjuh ïa ki tïar ïalehkai jong ka kynhun na bynta ka lympung ïalehkai Meghalaya State League kaban sa sdang noh shen mynta u bnai.
Ïa kine ki jersey la pyllait paidbah da u Rangbah Shnong ka Nongkseh, Bah Myrank Thangkhiew ryngkat ka jingdonlang u Doctor incharge ka Shastri Memorial State Dispensary, Laimer Dr. J Lyngdoh, ki riewrangbah bad kumjuh ki longkmie jong ka shnong nalor ka jingdonlang ki nongïalehkai bad ki nongshong shnong.
U Bah Daniel u la pynbna ruh ha kane ka sngi ba ki don haduh saw ngut ki rangialehkai ba ka Klob ka soi na ka bynta kane ka samoi bad kine ki kynthup ia u Sheen Stevenson Sohktung na ka Shillong Lajong, nangta uBabitlang Wahlang na Langsning, u Aibiang Mame Nongneng na Kickstart FC bad ruh u Banraplang Pyngrope na Mawlai SC.
Ha kane kajuh ka sngi, ka Club ka la pyllait paidbah ruh ïa ka jersey na ka bynta ka kynhun ïalehkai basketball jong ki kynthei kaba pynkhreh mynta ban shim bynta ha ka lympung ïalehkai kaban sdang noh shen ba pynlong da ka KSU.
Nangta ka la don ruh ka jingpynkup burom ïa ka Verem G Nongsiej kaba dei ka thei ïalehkai na katei ka shnong kaba la khur takma rnong ha ka Khelo India Tribal Games ha ka lympung ïakob jngi kaba dang shu lah shen ha Chhattisgarh.
Na ka liang ka klob ka la pynithuh paidbah ruh ïa ki samla na ka shnong kiban mih ban aireng ha ka lympung ïalehkai phutbol ha madan polo ha ka SSA 4th Division mynta u snem. Katkum ka jingïathuh jong u President, ka jingmih jong kine ki samla ka dei hadien ba bun ki nongshong shnong ki la pynpaw ba ki kwah ba kwah ban ïohi ba ki samla shnong kin mihlang shakhmat ban pyni ïa ka jingtbit jong ki ha ka phutbol.
“Ngi dap da ka jingkmen kaba khraw ban ïohi ba tang na ine i madan ba la ai sngewbha da u Myntri Rangbah Conrad K Sangma ïa ka Nongkseh, ki la mih haduh katne ki nongïalehkai la ka long ha ka phutbol bad haduh ka basketball.
Nga sngewkmen ruh ba kum ka klob ngi la lah ban sei ïa ka kynhun ïalehkai kaba paka kiba dei tang ki samla lajong ban mih madan ha ka Meghalaya State League mynta u snem,” u la ong.
Haba kren bad ki lad pathai khubor, u Bah Daniel u la ong ba ka jingmih ban aireng mynta ha ka MSL ka long kum uwei pat u mawjam na ka bynta ka kynhun ha ka lympung kaba kham heh bad kaba kham eh kaba kin hap ban tynjuh bor pat bad ki kynhun ïalehkai kiba kham khlain bor na kylleng ki bynta jong ka jylla.