Shillong, Lber 29 : Ka la mih ka jingkynnoh na u nongwad RTI Bah Disparsing Rani ba ka sorkar jylla haduh mynta kam pat siew satia ïa ka bai kali ba ki wai ha ka por ba wan Shillong u Myntri Kampohiing ka Ri, u Amit Shah mynta la shisnem tam.
Haba kren bad ki lad pathai khubor, u Bah Disparsing u la kynnoh ruh ba dei hadien ba u la wad da ka RTI ba ki sa tip ba na ka North Eastern Council ki la dep ban pyllait ïa ka pisa kaba 22lak tyngka kaba dei na ka bynta ka bai wai kali katba ka sorkar jylla pat kam pat siew haduh mynta.
Katkum ka jingïathuh jong u, ki la don haduh kumba 400 tylli ei ei ki kali kamai kiba ka NEC ka pyndonkam ïa kiba la shim wai da ka sorkar jylla ha katei ka por ba wan u Amit Shah sha Shillong ha u Kyllalyngkot 2021.
“Hynrei haduh mynta ka sorkar kam pat siew satia ïa ka bai wai sha ki trai kali. Kumta haba ki trai kali ki pan ïa ka bai wai na ka tnad Transport ka jubab ba ki ïoh ka long ba ka NEC kam pat pyllait satia ïa ka pisa.” la bynrap shuh shuh u Bah Disparsing.
Ha kajuh ka por, u Bah Disparsing u la ong ruh ba ka sorkar haduh mynta kam pat pyllait satia ïa ka pisa sha ki nong suplai tiar (vendor) naduh u nar haduh ka dewbilat na ka bynta ban pyntrei ïa ka skim 100 sngi ne MGNREGS mynta la kumba lai snem ei ei.
“Kine ki ong ba naduh u 2019 kim pat ïoh ïa ka pisa. Balei ki pynslem ïa kane ka pisa,” la buh jingkylli utei u nongwad RTI ïa ka sorkar.
