Pyllait ka kynhun Young Minds haduh 2 tylli ki Ambulance ban shakri ïa ki paidbah ka them Ri Bhoi

Nongpoh, Nailur 28: Ka kynhun Young Minds Association kaba dei kawei naki kynhun jong ki Samla naka thaiñ Bhoirymbong kiba ju trei mon sngewbha bad shakri naka bynta ka bha ka miat haka imlang ka sahlang bad khamtam kaba ju leh ïaki kam isynei naka bynta ki longiing ba duk ba rangli kiba donkam ka jingïarap da kaba pynshna iing bad shibun ki kam noh synñiang, mynta ka sngi kala ioh syndon ban pynlait 2 tylli ki Ambulance naka bynta ban ai jingshakri ïa kiba pang ba shitom haka them Ri-Bhoi.
Ïa kitei ki Ambulance la wan ban pynlait paidbah da u Dr T Sutnga Doctor Incharge ka Bhoirymbong CHC, Bah R Thabah Incharge ka Khapmara PIC, haka jingdonlang ki riew Rangbah ba kynthup ïa u Dr D Iongwai, Bah Ailong Pariat Rangbah Shnong Nonglum, Bah ST Rympei Rangbah Shnong Lumdaitkhla, Bah Kronding Nongbsap Rangbah Shnong Syllei U Lar, ki nongialam ñiam ba kynthup ïa I Rev. R Lamare, Rev JS Muksiar kiba la buh jingduwai ruh ban kyrkhu bad buh jingduwai ïaka kynhun Young Minds ba kan dang lah ban ai ka jingshakri sha ki paidbah ka dong ka thaiñ bad kumjuh ïa katei ka Kali Ambulance ba kin long ka jingkyrkhu ïaki paidbah kiba donkam ïaka haka pang ka shitom.
Ïa kitei ki ambulance la ioh ruh ban pynlait paidbah mynta ka sngi dei namar ka jingtrei shitrhem jong ki nongïalam ka kynhun hapoh ka jingïalam jong u Bah Isynei Hinge President ryngkat ki dkhot kiba don ruh ka jabieng kaba khlaiñ ban trei ban shakri ïaka dong ka thain kum ki khun Samla kiba dang eh dang khlaiñ.
Haba kren maitphang ha katei ka sngi naka liang u Bah Isynei Hinge kum u nongïalam katei ka kynhun u la ïathuh ba ïaka kynhun Young Minds Association la seng ha u snem 2017 tang katto katne ngut ki dkhot kiba dang samla bad kiba dang khlaiñ ka pyrkhat pyrdaiñ da ka jingangnud ban trei bad shakri naka bynta bha ka miat ym tang haka thaiñ Bhoirymbong hynrei wat sha kiwei kiwei ki shnong jong ka dong Ri-Bhoi bad ha kine ki khyndiat snem kila ioh ban leh shibun ki kam isynei ban noh synñiang sha ki longiing ba duk ba rangli ban pynsha iing watla kim kot bor ban pynshna iing paki dulan hynrei da kaba ker da ki siej tang ban lait naka sngi u slap bad lyngba kine ki kam barit jong ki, u Blei um shym la iehnoh ïaki ba kin dang trei naka bynta ka jingbha haka imlang ka sahlang bad shibun ki jingkyrkhu ki wan na lyndet.
U la ïathuh ruh ba ki don tang kumba katto katne ngut ki dkhot ha katei ka kynhun bad kiba bun naki ki dei kiba trei shitom ban bylla bad kyrshan ïalade, bad katei ka kali ka dei kaba ka kynhun ka shu shim da ka ram ban ai ka jingshakri ïaki paidbah da kaba ki siew mar khyndiat ïaka ram kali, bad ka jingsei ïa katei ka kali ka dei ruh hadien ka jingjia aksiden kaba shyrkhei kaba la jia ha surok Shillong Bye Pass ha ki snem bala leit noh ha kaba ki longiing kim shym la ioh Ambulance hynrei la shu kit da ka Bolero Pick Up ban pynpoi sha ki jaka sumar kaba la pynktik ïaki nongïalam bad katei ka kynhun ban sei syndon da ka Ambulance ban shakri sha ki paidbah.
Haba kren ha katei ka sngi kum u kongsan naka liang u Dr T Sutnga u la pynpaw ka jingsngewkmen bad ai ka jingïaroh ïaka kynhun Young Minds wat la ka dei ka kynhun kaba don tang khyndiat ngut ki dkhot pynban ki kam jong ka ki long kiba khraw da ka jingiohi jngai ki nongïalam, da kaba kyrtiang dien ruh ba ka Bhoirymbong CHC ka mad shibun ki jingeh ban phah ïaki nongpang sha kiwei ki jaka sumar namar ka jingduna Ambulance khamtam haka por ka jingwan lyngshop jong ka khlam Covid-19, bad kum ka jaka sumar ha katei ka thaiñ kan pyrshang ruh ban pynrung ïaki skhim ban pyndonkam ïakitei ki Ambulance ha kaba ki nongpang kim donkam ban siew pisa khamtam ki longkmie ba armet bad ki khyllung ba hapoh 1 snem.