Pyllait ka Apollo ia ka kot “My Food, My Health” ban ïaleh pyrshah ïa ki jingpang na ka rukom imsuk

Shillong, Naitung 12: Ka Apollo Hospitals, India, kawei na ka kadbah jong ki lad ai jingsumar ha ka ri ka la pynbna ïa ka kot “My Food, My Health,” kum kawei na ki lad jinghikai ban btin lynti ban ïaleh pyrshah ïa ki jingpang kiba jia na ka rukom ba la imsuk palat ha kine ki sngi, kaba la tip kum ka Medical Nutrition Therapy (MNT). Ïa kane ka kot la thoh da ka Ms. Anita Janata, Consultant Dietetic ha Indraastha Apollo Hospitals.
Ha kine ki sngi ki la don shibun ki jingpang kiba dei na ka daw jong ka rukom im jong ki briew kum ka jingpang shini, ka jingshngaid, ka jingpang shadem, ka jingpang bampong bad kiwei pat kiba nangphriang na ka sngi sha ka sngi bad ba ka jingpynsngewthuh bakla shaphang ka rukom bam kaba koit ba khiah ka jyllei bha. Kane ka kot “My Food, My Health” (Ka bam & ka jingkoit jingkhiah) kan long kum kawei na ki lad jingïarap ban ai jingshai bad jingskhem jingmut ha kaba ïadei bad ka koit ka khiah.
Ïa kane ka kot la pyllait paidbah da ka Kongsan, ka Mrs. Sucharitha Reddy bad la ai ïa ka kopi kaba nyngkong sha u Dr. Prathap C Reddy, Founder & Chairman jong ka Apollo Hospitals.
U Dr. Prathap C Reddy u la ong ba kane ka kot, kadei uwei pat u mawjam ban pynïoh ïa ka jingïada ïa ka koit ka khiah bad ka long kaba donkam na ka bynta baroh. U la ong ba ki paidbah ki don ka hok ban tip ïa ki jait jingbam kiba ki dei ban bam khnang ba kin lah ban pynneh ïa ka jingkoit jingkhiah khnang ba kin lah ban shim ïa ka rai kaba dei biang.