Nongstoiñ, Jymmang, 25: Kawei ka khynnah kaba la tip kyrteng kum ka Larikordor Syiem, 12 snem ka ka rta, ka khun jong u Bah Diningstar Kharbani bad ka Kong Phullinda Syiem, kiba shong ba sah ha ka shnong Nongrangoi (Umyiap), ka la pyllait im ïa u para ar kmie jong ka, u ba kyrteng u Saibanstar Syiem 6 snem tam ka karta, ha ka por ba u ngam jyllop ha ka thliew paiñkhana jong ki para marjan, kaba jylliew kumba phra phut ei ei kaba dap da ka um.
Kane ka la jia ha ka 22 tarik mynta u bnai ha ka por shiteng sngi katba ki kmie ki kpa, kiba ki dei nongrep, ki leit sha la ki kam ki duk bad ha shnong pat ki ieh noh tang ïa ki khun.
Haba pyrshang ban kylli na utei u khynnah u ba ngam jyllop ha ka thliew paiñkhana, u la ong ba ha katei ka por ma u bad u para ar kmie u ba dang kham rit ki la leit sha ka ïing jong u para marjan ban leit kheit soh phie. Hynrei kim ai kumta ki shu leit khar noh ïa kiba hap ha madan bad ha ka por ba ki mut ban wan phai noh, u la btuit bad ka slipar ka la hap ha katei ka thliew kaba dap da ka um palat ïa ka marshiteng.
U la ong ruh ba u la shim da u dieng uba rit ban woh ïa ka slipar bad u la hap shapoh. U para u ba kham rit pat u la ong ba ha ka por ba u la hap hapoh um, u ngam u per u ngam u per bad u rah ïa ki kti bad u la shim da uwei u siej ban phah snoh ba un ïoh tan shabar. Hynrei u siej u dkut noh kumta u la mareh ban leit khot ïa ki hynmen ban ïarap bad ka hynmen arkmie.
Katei ka hynmen ka Larikordor Syiem la mareh wut wut sha katei ka jaka bad haba ka la poi, ka la pajut na ka kti bad ioh sei shabar bad haba ka la ïoh ban tan shabar, ka la khem ïa ka met na shadien bad khñiot ïa ka kpoh bad shadem bad ka um ka la mih na shyntur bad thliew khmut. Hadien katto katne utei u para jong ka u la tip briew bad ka la ïalam noh sha ïing.
