Shillong, K’Lyngkot 17 : Ka jingai por jong ka Voice of the People Party (VPP) 24 kynta ïa ka sorkar ban thung biang ïa ki 3 ngut ki ophisar tohkit ka Lokayukta kiba la shah weng kam noh dang shen ka la pynlong ïa u Symbud Myntri Rangbah ka Jylla, Bah Prestone Tynsong ban kyntu ïa katei ka party ba kin pule bha shwa ïa ka Act jong ka Lokayukta.
Haba kren bad ki lad pathai khubor, u Bah Prestone u la ong,” Ngi la dep ban pynshai bad wat na ka liang ka party ruh ngi la dep ban pynshai. Ki la dei ban pule bha shwa ïa ka Act jong ka Lokayukta bad hadien ba ki la dep pule kin sa wan ban ujor. Namar khlem da pule bha kan ym ïahap.”
Shuh shuh u ong ruh ba wat ha ki kyndon jong katei ka Act la kdew shai ba ki ophisar ba don ha ka Lokayukta ki dei ban long ki ophisar kiba dang trei lane kiba dang don ha ka kam.
Dang shen na ka liang ka NPP kaba ïalam ïa ka sorkar, ka la kyntait ïa kane ka jingkynnoh ka VPP da kaba ong ba ki kyndon treikam jong ka Lokayukta kim shah ïa kine ki ophisar ba la.shongthait ban don ha ka jingtreikam, hynrei la shu thung shipor ïa ki ha ka kam.
Ha katei ka por, u Bah HM Shangpliang, Nongaiktien ka Party NPP, u la ïathuh ba ha ka jaka jong kitei ki lai ngut ba la wengkam, ka sorkar ka la thung thymmai ïa u Bah IW Ingty, IAS kum u Director of Inquiry and Prosecution ryngkat bad lai ngut ki ophisar kiba kynthup ïa u Chalang G. Momin, u John C Sangma bad u Bah Banteilang Diengngan.
