Puk khih biang ka KHADC bad ki Hima ban pyrshah pynbeit pud, 26 tarik yn rai khatduh

Shillong, Ïaiong 18 : Ka Khasi Hills Autonomous District Council ryngkat ki Hima kiba shah ktah ha ka jingpynbeit pud kaba nyngkong ki la rai ban ieng pyrshah ïa ka soskular ba la soi da ka sorkar Meghalaya bad ka sorkar Assam dang shen ha nongbah Delhi.
Haba kren bad ki lad pathai khubor hadien ka jingïalang bad ki khlieh nongsynshar, u Executive Member ka tnad Elaka, Bah Jambor War u la ong ba ki san tylli ki Hima kynthup naduh ka Hima Mylliem, Hima Jirang, Hima Nongspung, Hima Nonglang bad ka Hima Jyrngam ki la pynpaw ba ka jingpynbeit pud kaba la dep ka la ktah jur ïa kitei ki Hima.
U la ong ruh ba na ka liang ka Council ki la shim da kawei ka rai kaba khatduh ba kin kynduh biang ha ka 26 tarik ban shim ïa ka sienjam kaba tyngeh ban ïoh biang ïa ki jaka ba la pynhap sha Assam. “Ngi sngewthuh ba kane ka kam kadei kaba khia bad na kata ka daw ha ka jingïalang kaba la slem bha ngi la shim ïa ka rai ban rah noh ïa kane ka mat ban ïa kren ha ka 26tarik ha kaba ngin shim ruh ïa ka rai kaba khatduh kumno yn ïaid nangtei shakhmat ba yn duh lah ban pynbeit bad ruh ban ïoh pynphai noh ïa ki jaka kiba la dep pynhap sha Assam,” la bynrap u bah Jambor.
Shuh shuh u ong ruh ba ka jingsoi ïa katei ka soskular ka khlem ïadei satia bad ka kaiphod jong ka Boundary Committee jong ka Council kaba ka la phah sha ka sorkar jylla. “Ka khlem ïadei ruh bad ka kaiphod jong ki artylli ki regional committee ba kynthup ïa ka West sector bad ka Ri Bhoi sector. Dei na kata ka daw ba sa wanrah kine ki kynrum kynram bad ka jingbym hun jong ki Hima bad ki paidbah jong ka jylla,” ula bynrap shuh shuh.
U la ong ruh ba ka jingbym kynthup jong ka sorkar ïa ki trai jaka jong ki shnong, ki hima bad ka district council bad ka jingsoi ïa katei ka soskular ba kin ym hun satia bad dei na kata ka daw ki hap ban khih biang ban dawa pynbeit.
Haba bynrap lang, u Nongïalam ka Liang Pyrshah ha KHADC, Bah PN Syiem u ong ba lada ïa kren ïa ki jaka puta kiba hap ha katei ka jingpynbeit pud, ha Assam ki jaka ki hap ha ka jingpeit jong ka sorkar katba ha Meghalaya pat ki jaka ki dei kiba long trai da ki paidbah bad ki Hima. “Kumta lada khlem ka jingmynjur jong ki trai jaka kumno yn soi ïa katei ka jingpynbeit,” u la ong.
Ha katei ka jingïalang jan baroh ki khlieh nongsynshar na ki Hima bapher bapher kiba shah ktah ha katei ka jingpynbeit pud kaba nyngkong ki la wan ban shim bynta lang.