Prestone : U dewïong ba kit mynta um dei uba be-aiñ hynrei dei uba ladep lilam

Shillong, Nailur, 22: U Symbud Myntri Rangbah (SMR) jongka jylla u la kam ba ki trok kiba ïaid mynta kim dei kiba kit dewiong beaiñ hynrei ki dei kiba kit ïa uto u dewiong ba la pyllait ban die lilam 1 lak matric ton uba dei uto u dewiong uba la dep tih bad lum thup naduh mynshwa bad uba la ai hukum da ka ïing bishar ban lilam noh ïa u.
“ Hangno kata ka jingkhaïi beaiñ ïa u dewiong mynta, namar une u dei u dewiong ba la die lilam bad u dei uba la pyllait da ka Coal India Limited (CIL). Ym duna ïaka 1 lak matric ton na uto u 32 lak matric ton uba la lum thup bad lilam mynta bad kine ki trok ki ïaid bad ki challan ha surok” ong u Symbud Myntri Rangbah.
Kumta u la ong kine kiba ïaid mynta kim dei kiba kit dewiong beaiñ hynrei kiba kit ïa u dewiong uba la lilam. “ Kumta ngan ïathuh shai shaphi ba kine ki trok ki kit ïa u dewiong ba die lilam bad shen yn sa lilam ha West Khasi Hills bad Garo Hills ruh tang shu dep na Jaintia Hills” ong biang u bah Prestone.
ïa kane ula pynshai halor ka jingshah bat ki 18 tylli ki trok kit dewiong ha kawei ka seng bad kynnoh ïa ka jingbym treikam hok ki pulit ka Mawryngkneng Police Station ha ka por ba ujor ejahar.
U la ong “ Ki pulit kim lah ban kyntait ban register ïa ka ejahar, hynrei ka dei ruh ka kamram jong ki seng bhalang ban bud dien namar ki pulit kim lah ban kyntait ban register ïa ka FIR la don ne ym don challan ruh”.
U la ong ba ki briew kim dei ban ngeit tang ba la kynnoh dano re ba kine ki dei ki trok ba kit dewiong beaiñ. Ki la dei ban wad ïa ki jingshisha na ka tnad Mining bad Geology bad tohkit katno tylli ki challan la pyllait.
Halor ka jingkynnoh ba ki dei ki high level kiba pyllait ïa ki trk ban ïaid, u la kylli kiei kita ki high level, jer kyrteng ïa ki khnang ba ka sorkar kan leh ïa kaba donkam ym dei ban shu kynnoh ne sngap ïa ka jingkren laplah jongno re khlem ki jingshisha. Wad bniah la ki trok kiba ïaid ha surok ki don ki kot ki sla ba biang ne em. Lada kim don ki kot ki sla aiti sha ki pulit ki pulit kin hap ban kem beit ïa ki kata ka long kaba kongsan.
Halor ka jingkynnoh jongka Congress pat ba ka jur ka jinglum pisa na ki trok, u Symbud Myntri Rangbah ula ong ym donkam ban shu sngap ne jubab ïa ki jingkynnoh ba khlem nongrim. “ Ki jingkynnoh ba khlem nongrim ki lah ban long ha kano kano ka por hynrei kynmaw haba kynnoh ai bad ki jingshisha khnang ba ka aiñ kan leh ïa kaba donkam lada dei u Myntri Rangbah ne Symbud Myntri Rangbah ne mano mano ruh.