Ka long kaba sngewtynnad shikatdei ban ïohi ba u Conrad Kongkal Sangma Chief Minister ha ka sien ba nyngkong ha ka 12.02.25 u la pynlong ïa kata ka jingïalang ban ïa mir jingmut hapdeng ki katto katne ngut ki riewpaidbah ban ïoh jingmut shaphang kumno ban thaw Budget 2025-26 ïa kaba la tip kum ka pre-budget consulatation meet. Haba bishar, ka jingmut jong katei ka jingïalang ka long kumno ban aibhah khambun ha kino kino ki kam pynroi, la ha ka rep ka riang, ka ri jingri, kumno ban nangpynbha ïa ka pule puthi, infrastructure development bad kiwei kiwei.
Halor katei ka Infrastructure Development, u nongthoh u kwah ban wanrah hakhmat ka sorkar lyngba jong kane ka write-up ba kata ka jait development kam dei ban pynleit jingmut tang ha sor, dei ban phaikhmat de sha ki kyndong bad sha ki khapsor khnang ba kata ka development kan kren briew shisha. Balei ka Assam ka ñiewbeiñ bad ka shim kabu haduh katne ïa ka Meghalaya, ka daw ka long ba la leh klet bad leh meinah ïa ki jaka khappud bad ki shnong kyndong naduh ki sorkar ba mynshwa haduh mynta. To ngin phai mynta sha ka shnong Barato, West Jaiñtia Hills District, la arsnem kynthih hadien ba la plie paidbah ïa ka Barato Police Outpost ha ka 13.12.2022, ki police personnels ki dang hap ban shong khapngiah ïalade ha kawei ka ïingshongwai ha Barato. Hapdeng ki jingkyan jingkynad ba katne pyrshah ïa ka jingkyntur pud ka Assam ha Mukroh bad kiwei pat ki shnong ba marjan, kumno phin khmihlynti ban don bor pahara babiang haba tang ka Building ba kin treikam pura ruh kam pat biang ?.
Kum ka jingpynkynmaw, ka Latympang Welfare Organisation ka seng trei mon-sngewbha ba don office ha Shillong kaba peit bad kner ïa ka ïap ka im, ka roi ka par jong katei ka dong ka shnat ha ka Elaka Shiliang Myntang baroh kawei, ka la ïakhun tyngeh haduh 28 snem lynter kata naduh ka 01.07.1994 ha ka por ba danglong DGP u DNS Srivastava bad haduh ba ka sorkar ka la pynmih hukum ban pdiang bad pynlongkam ïa katei ka jingdawa ban plie Outpost ha Barato. Ka Seng haba ka kam ba ka ïakhun ma ka, kam dei kum ki politician kiba kam kpong bad knieh burom halor ka jingkyntur jong ki sniang, hynrei ka da don ki sakhi sabud ki babiang ba ka leit mihkhmat bad correspond bad ka sorkar na ka por sha ka por. Hooid, wat la ka don ka jingthmu ban wan inaugurate da u Home Minister bad DGP hynrei la hap ban pynkylla noh ïa ka programme ha ka khyllipmat ba khatduh namar ba jia noh kato ka jingshahsiat ïap jong ki 6 ngut ki para mynsiem ba kordor da ki pulit bad forest guard ka Assam ha Phlong, Mukroh. Dei namar kata ka daw la wan plie noh da u Bah Nujorki Sungoh, DC bad SP West Jaintia Hills.
Te ka jingkylli ka long, balei ka Police Department kam lah ban tei noh ïa la ka jong ka Office Building wat la ka la don la ka jong ka Engineering Wing la katta snem, ym pat i don dak don shin ei ei haduh mynta. Na ka bynta kane ka Pre-budget jong u Conrad Sangma bad kata ka CM connect jong u, dei ban shimkhia ban pynrung Budget noh ïa kane ka Building ban tei noh khlem pynslem shuh, kumba u James K Sangma u ong ha ka 27.08.2019 ha ka por ba u bat ïa ka Home Affairs, dei ban tei noh kloi ha Barato, kham pajih na ka flash-point. Ha ka jingïadei bad katei ka bynta, ka LWO ryngkat bad ka Dorbar Shnong ki la ïatreilang wat
ban pynïoh jaka ei sha ka Police Department ba kan tei ïa katei ka Outpost ha Madan Muknor hashwa ban rung sha ka Shnong Barato. Ka jaka kaba heh kumba 2.21 Acre (approximate) ïa kaba la ai sngewbha da I (L) Profitable Dkhar khun jong i kong Tilda Dkhar ha ka 31.07.2017 kat kum ka Gift Deed ba la pynskhem da ka Sub-Registrar Office T/C of G/D No.78 of 2017 ïa kaba la soi pynskhem ruh ryngkat bad u R.Mathu IPS, Superintendent of Police West Jaintia
Hills. Sa kawei pat, ka jaka baheh haduh 1.85 Acres (Approximate) ba la ai sngewbha, ka dei ha Lum Tlep Ksaw, Barato hashwa ban poi ha Veterinary dispensary kat kum ka Gift Deed ba la pynskhem da ka Sub-Registrar Office T/C of G/D No.79 of 2017. (Total Area : 4.06 Acres lane
1,78,640.00 Sq.ft approximate) Mr Chief Minister, balei ba dang pynslem ban tei ïa la ka jong ka Building haba kat katei ka jaka la lait ban thied ?. Mutdur lada hap ban thied ha ka dor ïew mynta, katei kam duna shuh ïa ka ar ne laiklur tyngka tang ka bai jaka bad katno kan ktah ia ka Yarong tyngka jong ka sorkar.
Haba sngap ïa ki jingkren pynroh hapoh Dorbar Assembly, sngew kumba ka sorkar ka kloi eh ban thung bun tylli ki Outpost bad Police Check Post ryngkat bad ka jingpynkhlaiñ bor pahara (police personnels) nalor ka Building na ka bynta jong ki. Ka long kaei kaba sngewsih ba ka Barato Outpost ka dangduna nadong hadong, ha u October
2024 la don kawei ka jingjia ba sngewsih ha katei ka shnong ïa kawei ka longkmie, tang namar ba ym pat don pulit kynthei ha katei ka Outpost hap ap baroh shisngi ba kin wan naduh na Nartiang Police Station ban pyndep ïa ka kam. Hynrei ym lah ban beiñ ïa ki pulit, haba ym pat biang ka office treikam te kumno keiñ kin buh ïa ka Women’s Branch ?.
Namarkata, lyngba jong kane ka pre-budget consultation, kyrmen ba kam dei tang ka programme ban shah shondur ha ki media (photo-opts) hynrei ka dei ban longkam. Dei ban buh khliehkhoh ïa ka kam jingïada ha khappud, lada ha khappud ka lait rynghang kan eh aïu ïa ki nongshun ban wan attack haduh ha Shillong kumba jia ïa ka ri Israél ha ka 7th Octocer 2023, ha kaba ki lehnoh Hamas ki wan hiarthma da kaba suk. Ki Outpost ha ki thaiñ khappud ki dei ban long well-equipped naduh ki tiar ïada, dei ban ai da ki suloi jong ka juk mynta, ym shuh da ki suloi thep-gear kumba ong u Bah RG Lyngdoh Ex-Home Minister. Nangta, dei ban buh ïa ki lad pathai khubor, da ki WiFi bad internet network kiba khlaiñ bor, ki Computer, strong room, jaka khilan met bad ki lock up cell kiba biang nalor kiwei pat na ka bynta ïa ka jingwan donkam ki paidbah. Nangta ban tei ym tang ïa ka Building hynrei wat ïa ka Fencing wall kaba khlaiñ ryngkat bad ka Watch Tower.
Kat ka report ba la ïohlum, ka Crime rate ha katei ka thaiñ ruh ka kiew bha, naduh ki kam tuh masi tuh blang, syiar, sniang, ki mar-rep mar-riang, ki don ruh ki kam ïashoh ïadat bad kam pynïap briew ba jia man ka por hynrei ki riewbymman ki ïaid sadhuh khlem don mano mano ba kem ne set along ïa ki. Katei ka jingjia ka buh jingsyier ïa ki kynthei khynnah bad ïa ki nongshong shnong baroh.
Nalor nangta, ki dak ki shin ki paw ba ka Assam ka tynjuh bor suki pa suki ban kyntur ïa ka khlieh ba ijli jong ka haduh ha khiewja ka Meghalaya namar ba shah jem palat. Mynshwa na Umkhyrmi, mihngi na Mukroh, mynta ka la kyntur haduh 8 Kilometre sha Mukroh, ka sorkar Meghalaya ka khlem leh ei ei. Ki lyngkha ki risai jong ki briew kiba im ha khappud ki shah lute lut ha ki poi-ei jong ki Karbi, nangta ki Mikir (Karbi) ki sdang ban pynibor wat ïa kiba leit campaign elekshon MDC sha Mukoirang, Phlephle, Khatkasla, Moojem bad shawei. Shano kane ka lam ?. Lada ka sorkar ba ngi la jied kam lah ban ai bor pahara ïa ki briew lajong, aitiar ïaleh ïa ki kumba dawa teng u Bah Hoping Stone Lyngdoh hapoh Assembly. Lada ym lah ban ai jingïada, phi tharai u paidbah u dangshaniah, em !. Sngewkmen ba ka Dorbar shnong Mukroh ka la weng noh ïa ka rai ban boycott ïa ka elekshon MDC ryngkat bad ki kyndon hakhmat jong u Magistrate ha ka 11.02.25, hynrei kum kitei ki rai kin dang jia lada ki nongshong shnong kim ïoh jingshngaiñ ei ei na ki bor ba dei ban ïada. Nalor nangta, ka Meghalaya Police Check Post ha Mukroh, sa shu da slap tang da i plastic stang bad i ïing tyrpait jot, sangsot ïa ki pulit ba dei duty bad ïa ki briew ha khappud. Kyrmen ba u Mr Chief Minister un shimkhia mardor ïa kane ka kam khnang ba ka ktien bad ka kam jong u kan ïa tally.
