Nongstoiñ, Naitung 1: Ka jingjur u slap ha kine ki sngi ka la wanrah ïa ka jingtwa khyndew ha bun ki jaka ha West Khasi Hills, hynrei haduh ba thoh ïa kane ka khubor, ka jingtwa khyndew kaba la jur palat ka dei ha ka shong Umlieh kaba don harud ka surok bah National Highway 44 (E) Shillong-Tura.
Ka jingtwa khyndew ha katei ka shnong ka dei ha ka surok Umlieh-Tyllang, kaba la jia ha ka por hynriew baje ei ei jong ka step lah sngi u Blei, ha kaba kawei ka ïing dewbilat kaba dei jong ka kong Nior Lyngkhoi, ka la shah tyllep ha ka khyndew bad ka la pra hi phum kat haduh ba ym ithuh ithaw shuh.
Haba kylli na ka kong Nior Lyngkhoi kaba dei ka trai jong katei ka ïing, ka la ong ba ka la dep shna ïa katei ka ïing la lai snem bad ka la pynlong kum ka dukan. Ka jinglut ha kaba shna ïa katei ka ïing ka la kot kumba arphew lak tyngka shaneng.
Ka la ong ba ha katei ka miet shuwa ba ka jingtwa khyndew kan jia ha ka por mynstep namar ba ka dei ka miet sngi u Blei, kumta ym shym la don briew satia ba thiah ha katei ka ïing, kumta ym shym don kano kano ka jingmynsaw ia ki briew.
Nalor kata hajan jong katei ka ïing kaba la shah taplup ha ka khyndew, ka don kawei ka kali maruti van kaba don ïa u registration number ML05 E 7050 kaba la shah syllad ha ka jingtwa khyndew, haduh ba ka la pra lyngkhot lyngkhai. Nangta kawei ka ïing kaba don ha jan ruh ka la shah tyllep khyndew tangba kam da jur than.
