Mawkyrwat, Jymmang 31: Ka United Democratic Party (UDP) ha Mawkyrwat Circle ka la pra phom hadien ba la jan baroh ki nongkitkam naduh ki nongkitam ka UDP Mawkyrwat Circle, UDP Youth Wing bad kumjuh ruh UDP Women Wing ki la mih bad iehnoh kam noh na ka jinglong dkhot ha kane ka party.
U bah Medalsing Lyngdoh ryngkat ki nongbud jong u mynta ka sngi ka 31 tarik ki la ïoh ruh ban khylliap ïa ka lama jong ka party bad ban aiti noh ïa katei ha lama ha u President jong ka UDP Mawkyrwat Circle.
Katkum ka jingïoh lum jingtip ba ka jingmih noh jong u bah Medalsing ryngkat bad ki nongkyrshan jong u na ka party UDP ka dei namar ka jingbym ïoh tiket na kane ka party ha kaba ki nongïalam na ka UDP Central Body ki la pynthikna ban ai ïa ka tiket ïa u bah Renikton Lyngdoh Tongkhar, MLA ka Mawkyrwat uba dei na ka Party HSPDP bad u ban sa ïa khun ha kane ka elekshon ha u snem 2023 na ka party UDP jong ka Mawkyrwat Constituency.
Haba kren ha ki lad pathai khubor, u bah Medalsing Lyngdoh u la kren shai ba ma u bad ki nongkyrshah jong u kim kwah da lei lei ban ïatreilang bad u bah Renikton Lyngdoh ne ban neh ha kane ka party bad kumba ki la ïa rai naduh nyngkong, hynrei mynta kin ïaid beit shakhmat ban pynkhlaiñ ïa kane ka kynhun bad u la ong ruh ba na ka liang jong ki kin sa ïashong bad pyrkhat shwa namar ïa mynta kim pat nang ban rai ha kano ka party ba kin sa leit ban long trai ne pynïashoh na ka bynta kane ka elekshon ban wan.
