Shillong, Jylliew, 19: Ki dak ki shin ka jingpra jong ka ktem treikam ka Bharatiya Janata Party (BJP) West Shillong ki la paw ha ka janmiet sngi Saitjaiñ ha kaba ka kynhun ki nongkitkam hapoh ka jingïalam jong u President u Bah Moses Bareh ryngkat ki nongkitkam ka BJP Qualapaty Unit ki la leit ban pynïasoh ïalade sha ka United Democratic Party (UDP) da kaba thaw syndon ruh ïa ka UDP Qualapaty hapoh ka UDP West Shillong Circle.
Ha ka jingïalang pdiang burom ïa ki nongkitkam la ïa donlang lang da u Working President jong ka UDP u Bah Paul Lyngdoh uba dei ruh u MDC jong ka Jaïaw Constituency u ban ïa aireng ruh na ka UDP ha ka elekshon sha ka Ingdorbar Thawaiñ ka ban sa long ha u snem 2023.
Kum ban shu pyntip, ka BJP ha West Shillong Constituency kan sei madan da u President ka BJP Meghalaya Unit, u Bah Ernest Mawrie. Haduh mynta u Bah Mawrie u la pyrshang ban pynkha ïa ki shnat treikam ha kylleng ka Constituency khnang ban pynkhreh ïalade na ka bynta ka elekshon ka ban sa long.
Ka jingïaleh ha West Shillong Constituency kan dei kaba shongshit ha kaba u Bah Paul uba dei u MLA barim bad u Bah Ernest u ban dang ïakhun ha ka sien banyngkong eh ïa ka elekshon MLA kin pyrshang ban pynliem ïa u MLA ba mynta u Bah Mohendro Rapsang uba la shah beh na ka seng Congress bad u bym pat kren shai pat haduh mynta na kano ka Party un ïa aireng pat ha ka elekshon ban wan.
Ha kane ka jingïalang ba la pynkha ïa ka UDP Qualapaty Unit la jied ïa u Bah Michael War kum u President, u Bah Embok Pakynteiñ kum u Working President, u Bah Lenmeo Bareh kum u Secretary, ka Kong Annu Lyngdoh kum ka Assistant Secretary nalor kiwei pat ki nongkitkam kiba don palat 25 ngut.
