Shillong, Jylliew, 26: Ki nongkitkam jong ka Hill State People’s Democratic Party (HSPDP) Rangshken, ha 23 tarik mynta u bnai ki la mih noh na ka Party da ka jingmut ban ai ka jingkyrshan pura ïa u MLA barim jong ka Sohiong Constituency u Bah HDR Lyngdoh ha ka elekshon sha ka Ïingdorbar Thawaiñ ka Jylla ka ban sa long ha u snem 2023.
U Bah HDR Lyngdoh u dei ruh u Myntri barim ka Sorkar Jylla Meghalaya bad u la shah rem noh ha ka elekshon MLA ba ladep kata ha u snem 2018 ha u Bah Samlin Malngiang u kyrtong ka HSPDP.
Dang ha kine ki khyndiat sngi, u Bah HDR Lyngdoh lem bad ki nongkyrshan baradbah u la rai ban iehnoh ïa ka Seng Congress bad pynkhreh ban knieh biang ïa ka shuki MLA na Sohiong da kaba un aireng na ka United Democratic Party (UDP).
Ki nongkitkam kiba la iehnoh ïa ka HSPDP ki kynthup ïa u Bah Arnes Kharphuli, u President ka HSPDP Rangshken Area, ka Kong M. Langstieh nalor kiwei pat. Kiwei pat ki rangbah na kiwei shnong ka thaiñ Sohiong kiba la rai kyrshan noh ïa u Bah HDR ki kynthup ïa u Bah Rishot Kurbah bad u Bah Balom Mawlong.
La pdiang burom ïa ki longkmie ki rangbah da u Bah P Langstieh ha ka jingïadonlang u Bah HDR Lyngdoh nalor ki nongkitkam ki nongkyrshan.
Kine ki nongkitkam bahakhmat jong ka HSPDP ki la ong ba kim don eiei ban kynthoh ïa u MLA ba mynta ne ïa ka HSPDP halor ka jingmih noh jong ki hynrei ki sngap ïa ka sur uba bun balang namar kiba bun ki la rai ban phaikhmat biang sha u Bah HDR Lyngdoh da ka jingkhmih lynti ba un shakri kham bha shuh shuh ban ïa kaba u la shakri mynshwa.
