Tura, Naitung 18: Ha ka jingshah pyniap kaba ishyrkhei, kawei ka samla lud kala shah pom daka wait haduh da iap ha uwei u briew hapoh ka shnong Samgong, Williamnagar ha ka sngi Thohdieng.
Une u briew ba la ithuh kum u James R Sangma ba na ka shnong Dawagre, Williamnagar, ula phet rieh bad ym pat lapdien haduh mynta.
Kane ka samla kaba dang leit skul, kala shah thombor hakhmat u paidbah, kaba la pynpar niangkhriat ïa ka imlang sahlang ha katei ka thaiñ.
Ki Pulit kila pynlong ïa ka jingthwet kaba jur bad pynbna ruh ïa ka khusnam song pisa ia kino kino kiba ai jingtip, kiba lam sha ka jingïohkem ïa u James. Ki Pulit kila kular ruh ban buhrieh ïa ka kyrteng ki nongai jingtip.
Ka jingtohkit mynta kala ïaid shakhmat bad ym pat lapksai ne tip shai satia kaei ka daw halor kane ka jingshah pyniap kane ka samla lud.
