Poi wir ki 11 ngut ki nong Bangladesh sha EJHD

Khliehriat Jylliew 16: Ki khatwei ngut ki briew ba kynthup ki rangbah, ki kynhei bad ki khynnah, kiba dei ki nong Bangladesh mynta ka sngi ki la wan poi wir sha East Jaiñtia Hills District da kaba ïaid lyngba na ka shnong Kuliang kaba don ha khappud bad ka ri Bangladesh, ïa kitei ki poi wir ki VDP Kuliang bad ki bor pyniaid shnong Kuliang ki la leit aiti noh ha kti jong ki pulit Umkiang Patroling Post.
Katkum ka ejahar ba la buh da u Secretary Shnong Kuliang, u bah Perwon Nongpluh, la ong ba ki dkhot jong ka Village Defence Party jong ka shnong Kuliang ha ryngkat bad ki dkhot jong ka Dorbar Shnong Kuliang mynta ka sngi ka 16 traik por kumba 9 baje mynstep ki VDP shnong Kuliang ki la ioh ban bat bad kem ia ki 11 ngut ki dkhar Bangladesh.
La ong ruh ba kitei ki poi wir Kim ki dei ki bym don ki kot ki sla kiba biang ban pynshisha ba ki dei ki nong India, ki dkhot VDP bad ki dkhot Shnong ki la ioh bat ruh ïa u nong ñiah kali, u Amal Kanti Das, uba dei na ka shnong Katiral kaba hap hapoh ka Katiral Katogorah Police Station, District Cachar District.
La ong ba ki tei ki khatwei ngut ki la kiew da ka kali ba don u registration number AS-12-Z-7069 kiba la ban wan rung tuh sha India lyngba ka shnong Kuliang, hynrei ki dkhot ka shnong ki la bat noh ïa ki ynda haba ki la poi sha rud surok jong ka shnong Kuliang, ha kaba ïadei bad kane la ioh bat ruh ïa ar ngut pat ki briew kiba la suba jur ba ki dei kiba don kti ha kane ka kam, kiba dei ruh ki trai shnong jong ka shnong Kuliang ba la tip kyrteng kum u John Patwad bad u Jingieit Suting kiba la iarap ïa kitei ki khar Bangladesh ban ïaid lyngba na ka Shnong Kuliang.
Haba la tohkit da ki pulit la lap ba don napdeng kitei ki 11 ngut ki nong Bangladesh kiba mut ban wan wad jingbylla, don ruh kiba mut wan wad dawai.