Khliehriat nohprah 02: Ka Sonapyrdi Tourism & Economic Development Society (STEDS) ka la poi thong ha kaba ka la ioh ban pyndep ïa ka jingiaid kjat ne ka Trekking sha u Lum Musliang kaba ar sngi lynter kaba la pynlong ha ka 28 tarik bad 29 tarik u bnai naiwiengbad 2025 bad Kane ka dei ka jingiaid kjat ne ka treking kaba ar ka ba la pynlong da kane ka society.
Ha kane ka trekking mynta ka snem la wan ban shim bynta lang da u Principal jong ka Jaiñtia Eastern College Khliehriat u Dr. P. Nongtdu kynthup lang ruh bad shynrang bad kynthei kiba na ki shnong bapher kiba napoh ka district bad kiba na bar ka district ruh.
La ong ba kane ka jingïaid kjat ne ka trekking ka la long kaba jop bad kaba sngewtynnad ha kaba baroh ki nongiashim bynta ki la ia poi lang bad ioh ban ïuh kjat haduh kliar u lum Musliang kaba ka thong jong kane ka trekking ruh ka long ban leit ïuh kjat halor utei u lum bad ïa une u lum Musliang lah ruh ban iohi na surok bah (NH-6) Narpuh.
Ka Sonapyrdi Tourism Economic & Development Society (STEDS) hapoh ka jingialam u bah Kwilnis S Suchiang uba dei u President jing ka STEDS bad u bah Tackmon L Gympad u Secretary ki la pynpaw ka jingkmen ba ki la ioh ban ialam ia ka kynhun jong ki nongiashim bynta baroh da kaba ai khublei ruh ïa tnat Wildlife Division ba ka la ai jingbit (Permission) ïa ka Society ban pynlong ïa kane ka Trekking hapoh Narpuh Wildlife sanctuary bad ka Society ka ai khublei sngewnguh ruh ïa ki nongtrei jong ka tnat Wildlife ba ki la btin (Guide) lynti ïa kynhun.
“Ha ka sngi sdang ban iaid, ka kynhun ka la ioh ban sahmiet ha Umswang ka jaka kaba don sha shiliang ka Wah Lukha mar pyrshah ka shnong Sakhri da kaba ngi la jam sha shiliang da ka lieng bad ha ka sngi kaba bud (Day 2) ka kynhun ka la mih 7:30 mynstep ban sdang pat ïa ka jingiaid lynti. Ngi la sakhi ïa ka jingitynnad ka mariang ka jingpah sngewthiang ki sim, ngi ring mynsiem ïa ka lyer ba iwbih suhsieng. Ka trekking sha ki lawbah lawsan kam dei kata ka jingmut kaba kut tang ha kata ka jingiaidkjat, hynrei ka ai ïa kata ka jingmut ban sngewthuh ïa ka jingkyrdor ka koit ka khiah, ka jingkordor ka mariang, ki umbam umdih, ki sim ki doh. Da ka jinglah ban pynneh ïa ki dieng ki siej, ngi lah ban im lem bad ki. Ka trekking ka dei ruh ka bynta ban don ka jingiadei ha ka jingiaieid para briew ban klet ïa ki jingsniew ba bun jait” Pynkut u kyrwoh na u Publicity Secretary STEDS u bah Lurstep Syih.
