Poi thong ka shnong Moolamylliang kaba la lah ban pynkylla khlaw biang ïa ka ‘Kwai’

Khliehriat, Jylliew 8: Ka shnong Moolamylliang kaba don ha East Jaiñtia Hills District ka dei ka shnong kaba ka tip kum ka shnong kaba khuid tam ha ri lum Jaiñtia kaba la ioh khur shibun tylli ki khusnam ha kaba ïadei bad ka jinglah ka shnong ban pynneh pynsah ïa ka mei mariang kaba kup rong jyrngam, kumjuh ruh mynnih ka sngi ka 7 tarik jylliew ha ka jingialang ba la pynlong ïa ka rakhe ïa ka sngi pynneh mariang ba la pynlong da ka ophis jong u Development Officer jong ka sorkar jylla, ba la pynlong ha Soso Tham Auditorium Shillong la pynkup burom ïa ka shnong Moolamylliang da ka khusnam ‘‘Best Natural Resourses Management ha EJHD’ bad la aiti ïa ka khusnam ha u Waheh Shnong ka Moolamylliang, u bah Apmon Pashiang.
Ha kaba iakren bad u Mawphor, u bah Apmon Pashiang, u la iathuh shuh shuh ba ka Dorbar Shnong ka don shibun ki jingthmu ban pyndep ha kaba iadei bad ki kam ban pynneh pynsah ïa ka mei mariang bad kaba sngewtynnad ban tip ba ki nongshong shnong jong ka Moolamylliang mynta ki la lah ban pynlong khlaw biang ïa kawei ka jaka ba ju khot ka ‘Kwai’ bad ong ba kane ka dei ka jaka kaba la syllen lut ki khlaw ki btap kaba na ka daw ka jingtih dewiong pathar kaba naduh u snem 2008 bad ki nongshong shnong mynta ki la lah biang pat ban pynlong ïa katei ka jaka kaba kup rong jyrngam sa shisien pat da kaba thung bun jait ki tynrai dieng.
La ong ruh ba ki nong shong shnong jong ka Moolamylliang ki la sdang ban thung dieng naduh ka 18 tarik u iaiong jong u snem 2014 bad ka la don ka jingkiew stet ha ka jing roi bad jingman bha ki tynrai dieng bad ym tang katta, ki la thung ruh ïa ki jait syntiew kiba bun jait ba kynthup naduh ki syntiew dieng, ki phlang bad kiwei kiwei ki jait jingthung, lah ban ong ba dei lyngba ka jinghsim khia ka Dorbar Shnong bad ka jingiatrei shit rhem lang ki paidbah nongshong shnong ba yn sa lah ban pynlong ïa ka shnong ka thaw bad ki sawdong sawkun kaba kup rong jyrngam bad ka la don ka jing ong ba ka ka shnong Moolamylliang ka la long kum ka Oasis jong ka East Jaiñtia Hills District.
U bah Apmon Pashiang, u la ong ruh ba ka Dorbar Shnong ka la buh thong ban pyndep shuh shuh sa ïa kiwei kiwei ki kam (activities) kiba ïadei bad ka jingpynneh pynsah ïa ka mei mariang bad la buh thong ba yn lah ruh ban trei pyndep ïa kiba bun ki kam bad ki skim ki ba la bei tyngka da ka NRM.