Poi Shillong ki heh AFC ban jurip ïa ka madan Polo shwa ban ïakhun ka India bad Maldives

Shillong, K’Lyngkot 19 : Ki heh Asian Football Confederation (AFC) kumjuh na ka All India Football Federation (AIFF) ki la poi ha nongbah Shillong ha ka janmiet sngi Saitjaiñ na ka bynta ban jurip pat ïa ka madan ïalehkai kaban pdiang ïa ki jingïakhun International hapdeng ka kynhun ïalehkai ka India pyrshah ïa ka Maldives bad kumjuh ruh ïa ka Bangladesh ha ki khyndiat bnai ban wan.
Haba pyntip ïa kane u President jong ka Meghalaya Football Association (MFA) Bah Hamletson Dohling u la ïathuh ba na ka AFC lamihkhmat da u Mindu Dorjee uba dei u Match Commissioner bad na ka AIFF pat la wan ban mihkhmat da u Abishek Yadav, Sr. Manager, Club Licensing and Competitions, jong ka AIFF ha Shillong.
“Ngi la ïoh ban ïa kren katto katne haba ïadei bad ka jingleit jurip ha ka step sngi Nyngkong (20tarik Kyllalyngkot,2025) bad ka long kaba sngewtynnad ruh ban tip ba u Mindu Dorjee u dei uba la heh la san bad pyndep ïa ka jingpule na Shillong, kumta u la sngewkmen ba u ïoh ban wan phai biang sha kane ka nongbah hadien 32 snem,” ong u Bah Hamlet.
Lah ban kdew hangne ba ka Shillong ka la shah jied ban pynlong ïa kine ki lympung ïalehkai bar-ri ha u Lber. Ïa ka jingïakhu kaba nyngkong hapdeng ka India bad Maldives ka lah ban long ha ka 19 lane 20 tarik u Lber.
Katba ka jingïakhun kaba ar pat kaba dei ka jingïakhun knieh rung sha ka AFC Asian Cup 2027 hapdeng ka India bad Bangladesh ha ka 25tarik Lber, 2025.