Poi NPP sa u MLA ka Mylliem Bah Ronnie V Lyngdoh

Shillong, Naitung 30 : Ka jingdon ki MLA Congress ha Meghalaya mynta ka la long ‘nod’, hadien ba u MLA ba marwei jong ka party na Mylliem Constituency, Bah Ronnie V Lyngdoh u la leit ban pynïasoh noh sha ka National People’s Party (NPP) ha kane ka sngi Balang.
Kadei ha ka shiteng sngi jong ka sngi Balang ba une u MLA ryngkat ki nongïalam ba hakhmat jong ka party ryngkat ka kurim bad ki khun ki la leit sha ophis treikam jong u Lamphang ka Ïing Dorbar Thawain ka Jylla, u Thomas A Sangma ban pyntip halor kane ka rai.
Ha kane ka sngi na ka liang ka NPP pat la wan ban synran lang naduh u Bah Sniawbhalang Dhar ba dei ruh u Symbud Myntri Rangbah ka jylla, nangta u Working President ka party Bah Hamlet Dohling nangta u Adviser ka NPP Mylliem Bah Daniel Thangkhiew kumjuh ki nongïalam na ka Youth Wing.
Na ka liang u Lamphang ruh hadien ba la bishar ïa ki kot ki sla baroh u la pynbna ba u Bah Ronnie u la dei u dkhot ba pura jong ka NPP naduh katei ka sngi hi. U la pyntip ruh ba ha shwa kane u la dep ban pdiang ïa ka shithi resain jong u kum u Opposition Chief Whip.
Da ka jingpynïasoh jong une u MLA ka Mylliem, ka NPP ka la kiew mynta sha ka 33 ngut ka jingdon ki MLA hapoh Ïing Dorbar Thawain ka jylla.
Hadien kane, haba kren bad ki lad pathai khubor, u Bah Ronnie u la ïathuh ba ka dawbah kaba pynlong ïa u ban pynïasoh sha ka NPP kadei namar ka jingkwah jong ki nongïalam kumjuh ki nongkyrshan hadien ba ki la ïohi ïa ka jinglong jingman ha ka jylla. “Kumta na ka bynta ka bha ka miat jong ka constituency bad jong ki paidbah ki la kyntu bad kyrpad ïanga ban shim ïa kane ka sienjam,” u la ong.
U ong ruh ba ka Congress kaba jop san ngut ki MLA ha u 2023 hynrei uwei pat u la shah jied noh kum u MP ka Tura bad hadien kane sa lai ngut ki la phet noh na ka party. “Kumta nga la sah sa tang marwei. Dei kane kaba pynlong ïa ki paidbah ban kyrpad ïanga ba nga hap ban pyrkhat bha na ka bynta ka lawei jong ka constituency bad ki paidbah. Kumta hadien ka jingïasyllok kaba la neh da ki bnai ngi la shim ïa kane ka rai ban pynïasoh noh sha ka NPP khnang ba ngin lah ban pynhun bad kot ïa ka jingangnud jong ki paidbah ka constituency,” u la bynrap shuh shuh.
Ha kawei pat ka liang, u Bah Ronnie u la ainam ruh ïa u Myntri Rangbah ka jylla da kaba ong ba hapoh ka jingïalam jong u, ba bun ki projek kam pynroi ki la paw bad ki tuid sha ka jylla.
“Kadei ka jingshisha ba dei hapoh ka jingïalam jong u Myntri Rangbah ba kine baroh ki la jia. Phi ïohi hi kaei kaba la jia kum ka nuksa ka jingshna ïa ka surok fourlane na Shillong sha Dawki kaba la ïaid shaid shaid mynta. Nga kyrmen ruh ba ynda la dep kane ka projek ngin sa lah ban poi ha ka por kat sha ki jaka ba ngi kwah ban leit,” ula ong.
Halor ka jingkylli, u Bah Ronnie u la pynpaw ruh ba kam shym la don kano kano ka jingteh kyndon haba ïadei bad ka jingpynïasoh jong u bad ka NPP.
Shuh shuh haba kren pat halor ka party Congress, u Bah Ronnie u la ong ba um don ei ei pyrshah ïa ka party namar ka jingmih jong u ban wan sha ka NPP kadei beit na bynta ka jingdonkam jong ka constituency.