Shillong, Rymphang 03: U Jayanta Saha uba dei uwei na ki nongrwai ba donsap ha kane ka bynta u la shahjied ban leit rwai kum u Finalist ha ka Top 16 jong ka India Talent Fight ka TV Reality show season 6 ka ban sa long ha ka 6 tarik jong u bnai Ïaïong mynta u snem.
Haba kren sha ki lad pathai khubor ha Shillong Press Club, u Jayanta Saha u la pynpaw ka jingai khublei ïa ki nongshong shnong ka jylla bad kiba shong ha Nongbah Shillong kiba la kyrshan ïa u ha ka por ba u ïakhun ban poi sha ka Semifinal ha ka kyrdan kaba 50 ha ka jingïakob kaba dangshen.
Kumta halor kane u la kyrmen ba un dang ïoh biang ki jingkyrshan sa ha kane ka jingïakhun jong ka jingïakob rwai kaba khatduh jong kane ka juh ka rynsan.
U la pynpaw ruh ka jingangnud ba lada u lah ban jop ha kane ka jingïakob kaba mynta kan long ka burom bad ka nam ïa ka jylla hi baroh kawei bad kumjuh ruh ïa ki nongshong shnong jong ka jylla kiba kyrshan borbah ïa u ha kane ka kynti kaba mynta.
