Jowai, Nailar 21: Ka jingleh Niam ïa ka Behdeiñkhlam ka Seiñ Raij Mukhla ka la poi mynta sha ka sngi ba ar katta ka dei ka sngi Mulong, ha kane ka sngi Mulong ki Khun Ka Seiñ Raij Mukhla dang step kila mih na ïing na sem ban leit sha khlaw ban leit pom ïa ki artylli ki diengkhlam ki ban pynïeng u wei ha madan tih kyndaw ha Wahshnong bad u wei pat ha madan Ryngkew ha slot masi.
Hadien ki la dep ban pom ïa kine ki dieng khlam te ha ka por 1 baje nohphai sngi ki khun ka Sein Raij Mukhla hapoh ka jingïalam u Pa Langdoh Niam bad ki Waheh Sankur kila ïa leit ban rah ïa kine ki ar tylli ki diengkhlam bad ïa kine ki diengkhlam la buh ïa ki ha madan ban pynïeng ïa ki lashai ka sngi.
Ha kane ka sngi leit rah diengkhlam la ïadon bynta lang bad u Rgh, Wailadmiki Shylla MLA, bad ka jing wanrah ïa kine ki artylli ki diengkhlam la ïoh biang ban ïa shong da ka Dorbar Niam ban ïa pyrkhat ïa ki kam Niam kiba ki khun ki hajar ka Seiñ Raij Mukhla ki hap ban pyndep lashai ka sngi Musiang kaba dei ka sngi ba 3 jong kane ka jingleh Niam ïa ka Behdeinkhlam, bad ïa kane ka Dorbar Niam la pynïaid ïa ka da u Pa Langdoh Niam ka Seiñ Raij Mukhla u Wh Wanbha Lyngdoh.
