Poi Jantar Mantar lang ki nonghikai na Meghalaya ban pyrshah ïa ka TET bad dawa pyntreikam biang ïa ka OPS

Shillong, Naiwieng 25 : Ki nonghikai Primary School na kane ka Jylla hapoh ka shatri jong ka All Meghalaya Primary School Teachers Association (AMPSTA) ki la leit ïashimbynta da ki spah ngut ban ïasnohkti lang bad ka All India Primary Teacher’s Federation (AIPTF) ha ka jingïakhih paidbah ha Jantar Mantar, New Delhi ban pyrshah ïa ka jingpyntreikam beit ïa ka Teachers Eligibility Test (TET) na bynta ki nonghikai katkum ka rai jong ka Ïingbishar kaba hakhliehduh (Supreme Court), bad dawa na ka Sorkar Pdeng ban tuklar mardor ïa kane, bad ruh ban dawa pyntreikam biang ïa ka skhim baibam barim lane ‘old pension scheme (OPS)’ na ka bynta ki nonghikai ha ka ri baroh kawei.
Hapoh ka jingïalam u President, Babu Dipak Marak bad u General Secretary Babu F.C Shullai, ki nonghikai na Meghalaya ki la ïashimbynta lang ha ka dharna ha Jantar Mantar, New Delhi ha ka lah sngi U Blei (24.11.2025), naduh ka por 10.30 baje mynstep haduh 3.30 baje janmiet ban pyni ka jingpyrshah ïa ka rai ka Supreme Court kaba la pynmih ha ka 1 tarik Nailur, 2025 ban bthah ïa baroh ki nonghikai Primary School ba ki dei ban pass beit ïa ka TET hapoh 2 snem naduh ba la pynmih ïa ka rai.
Na ka liang u Babu Shullai u la ai jingkren ha kane ka jingïakhih paidbah jong ki nonghikai kaba la ïashimbynta lang da ki phew hajar ngut ki nonghikai kiba la wan na kylleng ki Jylla ka ri India. Da ki spah ngut ki nonghikai na Khasi, Jaiñtia bad Garo kiba hap hapoh ka lama jong ka AMPSTA bad APSTA ki la ïasnoh kti lang ha kane ka dharna.
Ha kane ka jingïakhih, baroh ki nonghikai kiba wan na ki jylla bapher bapher ki la pynpaw da kawei ka sur ban pyrshah jur ïa ka rai kaba ïadei bad ka TET bad u Babu Shullai u la pynpaw ba ki nonghikai na Meghalaya ki kyrshan ïa ka rai jong ka AIPTF.
Ka AIPTF ka la dawa na ka Sorkar Pdeng ban tuklar mardor da kaba wanrah ka aiñ ha Parliament ka ban ai jingshngaiñ ïa ka lawei jong ki nonghikai Primary School ha ka ri baroh kawei.
Ka AIPTF ka la ong ba ym lah satia ban pdiang ba ki nonghikai kiba la don lypa ha ka kam hikai mynta da ki phew snem ba kin hap pyndep biang ïa ka TET namar kane ka dei beit ban treikam tang haba thung kam nonghikai ha ki por ban sa wan ym na ka bynta kiba la don lypa ha ka kam.
La pynïaid ïa ka jingïalang da u President ka AIPTF ha kaba la don ki nongkren na ki 23 tylli ki Jylla kiba kynthup ïa ki General Secreatary bad ruh u nongïasaid aiñ na ka bynta ka AIPTF ha Supreme Court uba la batai bniah ïa ka mukotduma.
Haba banjur ban pyrshah ïa ka TET, bad pyntreikam biang ia ka OPS, ki nonghikai kiba la ong ba lada ka Sorkar Pdeng kam phaidien ban khmih biang ïa kane ka mat yn pynlong da ka jingïalum paidbah kaba heh bha hakhmat ka Ïingdorbar Thawaiñ jong ka ri (Parliament).