Shillong, Ïaiong 11 : Watla ka Election Commission jong ka Ri kam pat pynbna ïa ka tarik elekshon ban pyndap ïa ka shuki MP kaba thylli sha Lol Sabha na ka Shillong Parliamentary Constituency hynrei na ka liang ka BJP Meghalaya ka la kam ba ki la don lypa haduh 5-6 ngut ki kyrtong kiba kwah ban ïakhun lane pan tiket na ka party.
Katkum ka jingïathuh da u Nongai Ktien jong ka BJP, Bah MH Kharkrang haba kren bad ki lad pathai khubor, la ong ba wat na ka liang ka party ruh ka pynpaw ba ki kwah ban ïa aireng ha kane ka elekshon MP.
“Kum ka Party ngi kwah ban ïakhun ïa baroh ki elekshon. Ha ka jingshisha, ha ki elekshon ba kham mynshwa kum ha ka elekshon MP ha u snem 2009 bad kumjuh ha u 2024, ngi la pynkhreh ban aireng tangba ngi ïoh noh ïa ka jingbthah ban ïatreilang bad kyrshan ïa ka kynhun ba ïatrei lang,” u la ong.
Kumba long mynta, u Bah Kharkrang u la ïathuh ruh ba ka party ka la ïoh pdiang bun ki jingtyrwa na ki kyrtong tangba ki ap shwa pat ïa ka rai na ki bor bahalor jong ka party.
“Tad haduh mynta ki la don haduh 5-6 ngut ki kyrtong kiba kwah bad kumta ngi kwah ba ki bor bahalor ka party kin sa shim noh ïa ka rai halor kane ka elekshon.”
Ha kajuh ka por u la pynpaw ruh ïa ka jingsngewskhem ba ka party kan sa sakhi ïa ka jingnang kiew ka jingdo nki nongyrshan lada ki aireng ha kane ka elekshon MP ba mynta.
“Lada ngi mih ban aireng ha ka elekshon, nga tikna ba ngin sa ïohi ïa ka jingnang kiew ka jingdon ki nongkyrshan ïa ka party bad kane hi kan sa nang kiew katba nang ïaid ka por.”
