Poi dak saw hynñiew tylli ki distrik ha ka jingbun ki nongdih bad nongdie drok

Shillong, Jylliew 12 : Ki la don haduh 7 tylli ki distrik jong ka jylla kiba la poi dak saw mynta ha ka jingdon ki briew kiba kyrni dih drok bad kumjuh ruh ha ka jingkhaii drok, ong u Myntri ka tnad Social Welfare, Bah Paul Lyngdoh hadien ka jingïalang bad ki heh sorkar na ki tnad bapher bapher jong ka sorkar jylla.
Hynrei, u la pynpaw pat ba ka tnad ka don la ka jong ka buit ban tehlakam ïa kitei ki kam beaiñ da kaba ïaid katkum ki lynti jong ka aiñ.
U Myntri haba kren bad ki lad pathai khubor ha ka janmiet sngi Nyngkong u la ïathuh ba ka sorkar jylla ka la lap ba kitei ki 7 tylli ki distrik kiba paw ha ka jingbun ki nongdih bad nongdie drok ki kynthup ïa ka East Khasi Hills, East Jaintia Hills, West Jaintia Hills, Ri Bhoi, West Garo Hills, West Khasi Hills bad ruh ka South Garo Hills.
Shuh shuh u ong ruh ba kitei ki distrik ki dei kiba ki ishu kiba ïadei bad ka jingdih bad die drok ka la kiew stet bha.
U Myntri u la pyntip ruh ba ha ka jingïalang kaba la donlang ki ophisar na ka tnad Pulit, Social Welfare, tnad ka Koit ka Khiah bad ruh na ka Meghalaya Institute of Mental Health and Neurological Science (MIMHANS) ruh kumjuh la ïa mynjur ba donkam ban don noh da ki kyndon (rules) kiba khlain jong ka sorkar jylla ha ka jingpyntreikam ïa ka Narcotic Drugs and Psychotropic Substances Act (NDPS) kaba dei ka ain kaban teh lakam ïa u drok.
La pyntip ruh ba ka sorkar jylla ka la wanrah da ka DREAM Project ba la tip kum ka – Drug Reduction Elimination & Action Mission, na ka bynta ban ïakhun bad rat dyngkhong ïa u drok ha kane ka jylla lyngba ka jingïatreilang jong baroh ki tnad sorkar halor kaen ka bynta.
Katkum ka jingïathuh jong u, ka sorkar jylla kala dep ban mang haduh 5 klur tyngka na ka bynta ban pynshai, pynsngewthuh paidbah bad kiwei kiwei halor kane ka DREAM Mission.
Shuh shuh la ïathuh ruh ba hapoh kane ka Mission, u Mission Director bad ka kynhun kin ïarap ïa ka sorkar ban poi sha ka thong.
“Lyngkot, nga kwah ban pyntip ïaphi ba ngin leh beit da ka kam ban rat dyngkhong ïa kine ki jingeh khlem pynslem namar kane ka ktah ym tang ïa ka imlang sahlang hynrei ka ktah ruh wat ïa ka jingshngaiñ ka imlang sahlang,” ong u Myntri.
Ha kajuh ka por u la pynbna ruh ba shen kin sa pynmih ïa ka Advisory Board kaban pyntreikam ïa ka Prevention of Illicit Traffic in Narcotic Drugs and Psychotropic Substances, (PIT NDPS) Act 1988 ha ka jylla.
“Ïa kane ka Board yn khlieh da u Judge ba la shongthait jong ka High Court ba dei ruh u Chairman ka State Consumer Council ban long kum u Chairman jong ka Board. Kane hi ka la plie ïa ka lynti ban pyntreikam ïa kane ka aiñ,” u la bynrap biang.
Katkum ka jingong jong u, ïa ki jingjia ba ïadei bad u drok la rejistar hapoh ka Narcotic Drugs and Psychotropic Substances (NDPS) Act 1985; hynrei namar ki don katto katne ki jingjynsur ki kyndon ha katei ka aiñ kum ka Section 64 A jong ka Act, kumta ka plie lad ïa ki nongdih drok ba kin lait na kti jong ka aiñ.
U ong ruh ba watla ki don ki kyndon kiba kham pyrkhing kum ka PIT NDPS Act 1988, hynrei ym lah ban pyntreikam ha ka jylla namar ka jingbym don jong ka Advisory Board.
Shuh shuh u la ong ruh ba hadien ba ki la pyntreikam, kito kiba ju mlien ha katei ka kam, kin sa ngat ha kti ka ain hapoh ka PIT NDPS Act kaba lah ban poi shah set along bad ba kin ym lah wat ban ïoh jamin na bynta lai bnai.
“Hapoh kane ka ain, kito kiba paw ha kitei i kam khaii drok la ka long kiba rit ne baheh kin ngat beit bad kin hap ban shah set la kumno 3 bnai bad lah ruh ban pynjlan haduh shisnem ruh,” u la ong.