Kolkata, Risaw 12 : Ka Myntri Rangbah jong ka West Bengal, ka Mamata Banerjee ha ka sngi U Blei ka la sdang ïa ka jingleit jurip sha ki jaka ba shah ktah jur ka jinglynshop mariang ha North Bengal bad pynbna ruh ïa ka song jingïarap ba 1.2 lak sha kito ki longiing kiba ka iing sah ka la shah pynjulor bad kumjuh ka khusnam ïa kito kiba don bynta ha ka jingai jingïarap.
Kumba 32 ngut ei ei ki briew ki la duh ei ïa la ka jingim bad da ki hajar ngut pat kiba la mynsaw bad sah khlem iing khlem sem na ka jingtwa khyndew bad jingshlei um na ka daw ka jingther u lapbah ba jur ha ki bynta ba shatei jong ka West Bengal dang shen mynta u bnai.
Na ka liang ka Myntri Rangbah ka la banjur ba ka jingpynbna ïa ka song jingïarap ba 5lak tyngka ka bai luksan sha kito kiba haiing kiba ngat ha katei ka lanot nalor ka kam na ka bynta iwei naman la kawei ka longiing.
Haba kren bad ki lad pathai khubor ha kadliengsuin Kolkata shwa ba kan leit jurip ïa kito ki jaka ba shah ktah kaban bteng haduh ka sngi Thohdieng, ka Myntri Rangbah ka la ong ba nyngkong kan leit shwa ha ki bynta jong ka Hasimara kaba ha Alipurduar district na ka bynta ka high-level review meeting bad ki heh sorkar ban tip ïa ka jingduh bad ruh haba ïadei bad ki jingai jingïarap bad jaka sah na ka bynta kito ki lanot.
Hadien kane pat kan leit sha Nagrakata bad ki jaka ba marjan nangta sa shaMirik kaba hap ha arjeeling hills.
Ka Myntri Rangba ka la ïathuh ba kan leit ruh sha nongbah Darjeeling ban leit peit thuh bad lum jingtip haba ïadei bad ki lad ai jingïarap ha ki bynta jong ka Kalimpong nangta kan sa wanphai noh pat sha Kolkata ha ka sngi Thohdieng.
Ka jingther u lapbah naduh ka 04tarik mynta u bnai ha ki bynta ba shatei jong ka Bengal ka la wanrah ïa ka jingtwa khyndew bad ka jingshlei um kaba jur kaba poi haduh u pud ba 32 ngut ki briew ki la duh ei ïa ka jingim bad da ki hajar ban shong khlem iing khlem sem.
