Khliehriat, ïaiong 29: Ha ka jingpyrshang ban thaw ïa ka jinglong jingman kaba ïahap ha ka jingïalehkai ha ka District bad ban ai ka rynsan ïa ki nongïalehkai ban kyntiew ïa ka sap ka phong jong ki bad ban pynshlur ïa ki samla ban ïashim bynta ha ki kam ïalehkai, la plie ïa ka Madan ïalehkai Futsal lyngba ka District Mineral Fund (DMF) kaba hap hapoh ka Wapung C&RD Block da u myntri sorkar ka jylla Meghalaya uba dei ruh u MLA ka thaiñ, u Bah Kyrmen Shylla.
Ha kane ka sngi plie paidbah la donlang ruh u Deputy Commissioner ka East Jaiñtia Hills District, u Shivansh Awasthi, IAS Deputy CEM ka JHADC, u ma Lasky Rymbai, u Deputy Chairman, ka Jaiñtia Hills Autonomous District Council, ma Wailaddameshwa Siangshai, ki riew rangbah jong ka thaiñ, ki nonghikai bad ki khynnah skul.
Haba kren ha ka jingïalang, u ma Kyrmen Shylla u la ai khublei ïa baroh ki nongshim bynta kiba la pynlong ïa kane ka projek kaba jop da kaba pynksan ïa ka jingdonkam jong ka jingïalehkai ha kane ka juk mynta bad ong ba ryngkat bad ka jingkiew jong ki jinglong kiba sniew ha ka imlang sahlang ha kaba bun ki samla ki la ngop ha ki jingpang ha ka imlang sahlang, ki jingïashim bynta bapher bapher jong ka ki kam ïalehkai kynthup ïa ka phutbol bad kiwei kiwei wat kumta u la ban jur halor ka jingdonkam ban pynbiang shuh shuh ïa ki lad jingïalehkai ha ka distrik ki ban plie lad ïa ki samla ban ïashim bynta ha ki kam ïalehkai bad ki ban thaw ruh ïa ka jinglong kaba biang na ka bynta ki nongïalehkai kiba kwah ban long ki nongïalehkai ban kyntiew ïa ka sap bad ka phong jong ki.
Shuh shuh, u ma Shylla u la kdew ruh ba ka madan ïalehkai Artificial Turf ha ka shnong Deinshynrum ka la sakhi ïa ka jingkiew kaba khraw ha ka jingdon jong ki nongïalehkai kiba pyndonkam ïa ki jingdonkam ba la pynbiang hapoh jong ka bad pynpaw ka jingkyrmen ba ka jingplie ïa ka madan ïalehkai Futsal ha ka shnong Sohkymphor kan pynshlur shuh shuh ïa ki nongïalehkai phutbol kiba kwah ban ïalehkai phutbol jong ka thaiñ ban nang pynjanai shuh shuh ïa ka sap jong ki.
Na ka liang jong u Deputy Commissioner ka East Jaiñtia Hills District, u Shri Shivansh Awasthi, ha ka jingkren jong u, u la ai khublei ïa baroh ki nongïashim bynta ha kane ka projek katba u la pynpaw ruh ba ka madan Futsal ba dang shu plie thymmai kaba la bei tyngka lyngba ka DMF la khmih lynti ba kan ai lad ïa ki samla trai ri bad ban wanrah ïa ka ïoh ka kot na ka bynta ka shnong ka thaw. U Awasthi u la ban jur ruh ïa ka jingdonkam ban pynneh pynsah ïa ki jingtei thymmai khnang ban pynthikna ïa ka jinglong slem bad jingtreikam jong ki.
U la kyntu ïa ka komiti shnong kaba pynïaid ïa ka madan Futsal ban mang katto katne na ka khajna ba la ïoh na ka madan na ka bynta ki jingthmu ban maramot khnang ban pynthikna ba ka jingdon jingem kan ïai bteng.
Ha kane ka prokram la pynkmen bad shongshit ia ki nongwan ïashim bynta da ka jingshad kolshor ba la pyni da ki samla pule bad ki dkhot SHG jong ka thaiñ.
Kiwei de kiba la ai jingkren ha kane ka prokram ki long u Deputy CEM ka Jaiñtia Hills Autonomous District Council u ma Lasky Rymbai bad u Deputy Chairman ka JHADC u ma Wailaddameshwa Siangshai.
