Plie u TD Shira ïa ka Tamasa Cultural Bonanza Tyisam ba-ar sngi

Baghmara, K’Lyngkot 28: U Myntri Sorkar ba peit ïa ka kam jngohkai pyrthei u T.D.Shira u la plie paidbah Cultural Bonanza Tyisam Festival ba-ar sngi ha Golden Beach, Baghmara da ka jingsngewtynnad ba khraw ha ka sngi Balang.
U Myntri u la pynpaw ïa ka jingkmen bad jingsngewhun ban ïashim bynta ha kane ka tamasa kaba ar sngi katba u la pynpaw ba ka Baghmara Simsang beach ka pynkynmaw ïa u ïa ka rud duriaw ba pawnam jong ka Marina Beach ha Chennai.Hynrei ka jaka shyiap ha Baghmara ka kham heh shibun haba ïa nujor bad kata ka rud duriaw.
U myntri u la kyntu ïa ka jingialum lang paidbah ba kin ïaleh ban khring na ka bynta ka kam jngohkai pyrthei hapoh ka dong ka thain da kaba thaw ia ka jinglong kaba lah ban khring ïa ki nongjngohkai pyrthei kiba kham bun khamtam ha ka rud wah Simsang kaba lah ban kyntiew ïa ka ioh ka kot jong ka thain.
U la ong ruh ba ka State Tourism Department ka angnud ban kyntiew ïa ka kam jngohkai pyrthei ha kylleng ki jaka jong ka jylla bad kyntu ïa ki paidbah ka South Garo Hills ban pyndonkam pura ïa ki marpoh khyndew kiba don bad ban pynlong ïa ki jaka jngohkai pyrthei kiba ïadei.
Ha kane ka jingïalang ba nyngkong eh la pynlong ïa ka jingpyni nam ïa ki syntiew, ka jingpyni ïa ki jhur, ka jingïakob rwai bad shad, ki jingïalehkai tynrai, ki jingïalehkai ha beach bad ki jingrwai ha kaba la ïa shim bynta da ki kynhun tem ba pawnam jong ka Garo Hills band North Wind, ka Rough Road bad ki kynhun tem na ka thaiñ.
Kane ka tamasa kan pyni ruh ïa ka kolshor bad ki riti dustur kiba riewspah ryngkat bad ka jingpynksan ïa ki jingrwai ba shibun ki tiat ba la shu thain kti hi bapher bapher bad kiwei kiwei ki mar rep jong ka thaiñ.
Ha kane ka prokram plie paidbah ladon lang u MLA ka thaiñ u Kartush R Marak bad kiwei kiwei ki riew pawkhmat.