Nongstoiñ, Nailur, 14: U Symbud Myntri Rangbah ka Jylla uba khmih ïa ka tnat PWD (Roads) Bah Prestone Tynsong ha ka sngi Saitjaiñ u la buh ïa u mawnongrim ban shna ïa ka Rambrai-Phodumbah.
Ka surok na Rambrai sha Mawlangsu kaba ïaid lyngba ki lai tylli ki shnong, kata ka Mawthungmarwei, Phodumbah bad Domkohmen kaba jngai kumba 11 kilomitar tam, ka dei kaba donkam bha na ka bynta ki paitbah nongshong shnong hynrei kam long shuh ban ïaid kali namar ka jingsniew kaba la palat.
Hynrei hadien ba ki paitbah ki la ïakynduh shibun ki jingeh ha ka leit ka wan, ki nongsynshar shnong katei ka thaiñ ryngkat ki sengbhalang na ka por sha ka por, ki la leit ban pysngew sha ka sorkar bad ban kyrpad ba kan mang pisa, na ka bynta ban pynbha ïa katei ka surok.
Dei tad ha u snem ba la dep ka sorkar ka la lah ban pynrung kumba san kilomitar, na Mawlangsu haduh Phodumbah ha ka thup jong ka Pradhan Mantri Gram Sadak Yojana, ha kaba ka sorkar pdeng ka la mang pisa na ka bynta ban pynbha bad siangrong ïa kateri ka bynta.
Nalor kata ïa ka bynta kaba sah kumba hynriew kilomitar shiteng na Phodumbah shaduh Rambrai, ha kine ki bnai ba la dep ka sorkar ka la mang pisa biang biang kumba khatwei klur tam, na ka bynta ban pynbha bad siang rong ïa katei ka surok na Rambrai sha Phodumbah ka ban pynïasoh bad ka PMGSY kaba sdang na Mawlangsu.
Hadien ba ka sorkar ka la dep ban mang pisa ha ka sngi saitjaiñ ka 13 tarik Nailur, u bah Prestone Tynsong Symbud Myntri Rangbah ka jylla u ba dei peit ruh ïa ka tnad PWD Road, u la hiar sha Rambrai ban plie ïa u maw nongrim na ka bynta ban sdang pyntrei noh artad ïa katei ka surok.
Ha katei ka sngi shuwa ban plie ïa u maw nongrim, la pynlong ïa ka jingïalang ba lyngkot ha Mawthungmarwei ha ka jaka ba katei ka surok ka ïasoh bad ka surok bah Nongstoiñ-Rambrai-Kyrshai.
Ha katei ka jingïalang la ïadon ryngkat da u bah R.G.Momin MLA bad u bah Lurshai Kharbani MDC ka Rambrai Jyrngam, u bah Gabriel Wahlang MLA ka Nongstoiñ, bah Himalaya Shangpliang, ki ophisar jong ka tnad PWD jong ka Nongstoiñ ki riew rangbah katei ka thaiñ bad ki paitbah.
U Bah Prestone haba ai jingkren u la bthah ïa ki ophisar ka tnad PWD naduh u Executive Engineer, SDO, SO bad kiwei kiwei kiba dei peit ïa ka jingpyntrei ïa ka surok ba kim dei ban ailad ba ki kontraktor kin trei torti hynrei ki dei ban peit bniah ba ka jingtrei ka dei ban long kaba biang bad kaba neh.
La ïoh ïa ka jingkren lyngkot na u Bah Lurshai Kharbani MDC bad na u MLA ka Rambrai, u R.G Momin.
