Plie u President ka Seiñraij Jowai ïa ka Madan Kñia Pyrthat ki ‘Soo Langdoh’

Jowai, Naitung 01: Ka Seiñraij Jowai mynta ka sngi thohdieng kala plie ïa madan kñia pyrthat jong ki ‘Soo Langdoh’ kiba hap hapoh ka Elaka Jowai kita ka Langdoh Jowai, Langdoh Tuber, Langdoh Ïalong bad Langdoh Kongwasan Chyrmang haka jingïalang ba ka pynlong ha katei hi ka madan kaba don ha Dulong Pohhali Jowai.
Ïa kane madan kñia pyrthat la plie da u President ka Seiñraij Jowai ma O.R. Challam ha ryngkat ka jingdonlang u Dolloi ka Elaka Jowai ma Puramon Kynjing, ma S.K Lato, ki President bad Secretary jong ki Soo Langdoh, ki Waheh Shnong na ki 8 tylli ki dong bad kiwei de, katba ïa ka jingïalang la pynïaid da u Vice President ma Hercules Toi.
La sdang ïa ka jingïalang da kaba khap shwa ïa u ribon jong kitei ki saw tylli ki ïing Langdoh bad la don ka jingnguh Blei da u Dolloi ka Elaka Jowai.
U ma O.R Challam kum u kongsan haba ai jingkren ula pynsngew ïa ka jingïaid lynti jong ka Seiñ Raij Jowai ha kine ki snem ba la leit, kata ban wad ki lad ki lynti kumno ban ïoh pynshna ïa kane ka jaka kaba biang na ka bynta ka lehñiam kñia pyrthat bad kala urlong mynta ka sngi kaba la pyndap ka jingkmen kaba khraw ïa ka Seiñraij hi baroh kawei.
Shuh shuh ula pyntip ba dei lyngba ka jingtrei shitom jong ka Seiñraij Jowai la lah ban pynmih pisa (Fund) na ka bynta ban tei ïa kane ka jaka kumba la long mynta, ha ka juh ka por ula pynsngew ba na ka liang jong ki kila dep ban pan jingïarap na ka sorkar hynrei ym shem la ïoh kano kano ka jingïarap bad dei da ka jingtreishitom bad ka umsyep kaba mih na ka Seiñraij Jowai la lah ban shna ïa ka, ong u ma Challam.
Ula ai ruh ka jingkyntu ïa kitei ki saw Langdoh ba kin pyndep hok ïa ki kam kiba dang sahteng ha ka jingshakri da ka jingïatreilang jong ki Seiñraij hapoh ka Elaka Jowai ula pyntip ruh ba ki dang don ki kam kiba ka Seiñraij ka dang hap ban pyndep ha kine ki sngi ban wan.
Katba na ka liang u ma S.K Lato haba kren ula ong ba ‘ka ñiam bad ka Dustur ka long ka juh bad ym lah ban pynïakhlad ïa ki’. Ula pyntip ruh ba ka Kñia Pyrthat ka dei ka lehñiam ban pyndep nyngkong hashwa ban poi ka Lehñiam Behdeiñkhlam.
Ula pynpaw ba ym lah ban mutdur ba kane ka jaka ka long kumne ha ka jingitynnad namar ha ki por mynshwa ha 50 snem kiba la leit kane ka jaka kam long satia kaba biang namar ka jinglong khohruh khohram.
Kiwei de kiba ai jingkren ki kynthp ïa u Secretary ka Seiñraij ma Arworki Sumer katba ïa ki kyntien ai khublei la ïoh na u ma H. Passah uba long u Vice President ka Seiñraij Jowai.