Mawkyrwat, Lber, 31: U Principal Secretary ka Sorkar Jylla uba khmih ïa ka tnat Community & Rural Development P. Sampath Kumar ha ka sngi Thohdieng u la plie paidbah ïa ka R&CC ne ka Rehabilitation & Counselling Centre banyngkong eh ha South West Khasi Hills District ha ka shnong Sohkhyllam, Mawkyrwat.
Lah ban kdew ba kane ka R&CC ka long ka ïing sah shipor kaba long kum ka jaka sumar bad ai jingïasyllok na ka bynta kito kiba la kyrni ha u drok bad kiwei pat ki jingdih ba sniew, kiba don ka jingangnud ban kylla bad pynbha ïa la ka jingim.
Ïa kane ka ïing la tei ha ka jingmang pisa kaba T. 59 lak bad lah ruh ban buh haduh 15 ngut ki briew kiba don ha ka jingeh bad ki jingdih ba sniew.
Ym tang kata, na ka liang ki nongkitkam jong ka Life Care Foundation Rehabilitation & Counselling Center ki khot ruh ban pdiang ïa kiba donkam bad kwah jingsumar hapoh kane ka jaka sumar bad kan sa sdang noh shen. Ka jingsiew ka long T. 5000 tyngka shi bnai. Namarkata, kiba thmu ban wan kin ai jingtip da kaba phun ha u +91-7627993186 u Secretary, bah Steppingstone Syiemlieh.
U P. Sampath Kumar, IAS, Principal Secretary, Community & Rural Development Department jong ka Sorkar Meghalaya haba kren ha ka jingïalang u la pynpaw ka jingaikhublei na ka bynta ka jinglenlade jong ki riew rangbah kiba don hapoh jong ka Life Care Foundation Rehabilitation & Counselling Center kiba la don ka jingïohi jngai ban ïarap na ka bynta ki briew kiba donkam ka jingïarap khamtam eh kiti ki briew kiba la shah teh shah khum ha u drok. Ym tang kata, u la ong ruh ba naduh ba lMission ne ka Drug Reduction, Elimination, and Action Mission ka la buh ne pynphalang ïa ka jingmut jingpyrkhat jong kiba bun ha kaba kumno ban tehlakam na ka jingsniew jong u drok.
Shuh shuh u la ong ruh ba kum kane ka jaka sumar na ka bynta ki briew kiba la ngop ha u drok ka la don hapoh Mawlai bad kane ba la plie paidbah ka dei kaba ar. Kumta u don ka jingkyrmen ba da ka jingdon ïa kiba kum kine ki jaka sumar kan long ka jingïarap na ka bynta jong ki, ba kin im ka jingim ba bha. Ym tang kata, u kular ruh ba na ka liang ka Sorkar ruh kan sa ai ka jingïa ka jingkyrshan kumno ban pyntyllun ïa ki kam ha ka ban tehlakam ïa ka jingpur ne saphriang stet jong u drok da kaba kyrpang ïa ka jingïatreilang jong ki Shnong ki thaw, ki sengbhalang, ki nongtrei ha ka koit ka khiah, ki Pulit bad kiwei de.
Ha kane ka sngi, la sakhi lang da ki heh sorkar bad ki riew rangbah kum u bah T. Lyngwa, IAS, Deputy Commissioner barim jong ka South West Khasi Hills District, u bah B. Jyrwa, MPS, Superintendent jong ki Pulit, lem bad kiwei de.
La pynïaid ïa ka jingïalang da u bah T. Marweiñ, Vice President ka Life Care Foundation Rehabilitation & Counselling Center. Ki nongkren ha kane ka jingïalang ki kynthup ïa u bah P. Wanniang, Myntri Shnong Sohkhyllam, u bah E. Tariang, District Social Welfare Officer, bad u bah Renikton Lyngdoh Tongkhar, MLA ka Mawkyrwat Constituency uba long ruh u President ka Life Care Foundation Rehabilitation & Counselling Center.
