Plie u Myntri Sorkar Pdeng ïa ka Integrated Textile and Tourism Centre ha Ri Bhoi

Nongpoh, Nohprah 06: Kan long shisha ka jingmyntoi kaba khraw ïa ki nongthaiñ nongwet, ki nongshna jingshna, ki nongthaiñ jaiñ bad ki nongthir ksai ka Ri Bhoi bad ha ka jylla hi baroh kawei, ha kaba mynta ka sngi u Myntri ka sorkar pdeng ba dei peit ïa ka tnad Textile u Giriraj Singh u la wan ban plie paidbah ïa ka Integrated Textile and Tourism Centre kaba don ha Saiden ha ka thaiñ Nongpoh ha ha Ri Bhoi District.
Ha kane ka sngi une u Myntri ka sorkar pdeng ym tang ba u la plie paidbah ïa ka Integrated Textile and Tourism Centre bad u la lah ruh ban plie paidbah ïa ka Multi-Day Ekta – Exhibition cum knowledge sharing for Textile advantage programme kaba ki la pyni nam ïa ki jingshna bad ki jingthaiñ bapher bapher ha kane ka ITTC Nongpoh Ri Bhoi Distrct.
Haba plie ïa katei ka ITTC ha Nongpoh la wan ruh ban sakhi da u Myntri khynnah ka sorkar pdeng uba peit ïa ka tnad Textile u Pabitra Margerita, u Myntri ka tnad Textile ka sorkar Meghalaya u Bah Metbah Lyngdoh, u MLA ka Nongpoh u Bah Mayral Born Syiem, u MLA ka Umsning u Dr. Celestine Lyngdoh, ka MDC ka Nongpoh ka Kong Rona Khymdeit bad kiwei kiwei ki heh ophisar ka sorkar na ka tnad Textile ka sorkar India bad na Meghalaya.
Ha kane ka sngi la wan shim bynta ruh da ki ki nongshna jingshna, ki nongthaiñ jaiñ, ki nongthir ksai ha kaba ki la pyni nam ïa ki tiar ki tar lyngba ki jingthaiñ bad ki jingshna bapher bapher ba la wan ban shim bynta na kylleng ka ki jylla shatei lam mihngi ka ri India ban pynphuh pynphieng ïa kane ka sngi khamtam, ka jingbna nam ki jaiñ ryndia, ki jaiñ muga, ki jaiñ rusom bad jain tasar.
Haba kren kum u kongsan ha kane ka sngi ba ka jylla Meghalaya kan sa ioh ïa ka jingmyntoi kaba khraw, u Myntri ka sorkar pdeng ba dei peit ïa ka tnad Textile u Giriraj Singh, u la ai kata ka jingkular ba un wan rah ïa ka Handloom Service Centre ha Ri Bhoi, lada ka sorkar Meghalaya ka lah ban ai ei ïa ka jaka kaba donkam haduh 10000 sq ft. kane ka Centre kan long kum ka iew ïa die ïa thied ym tang na ka bynta ka jylla Meghalaya, hynrei na ka bynta ki jylla shatei lam mihngi ka ri India, ha ka ri India bad wat shabar ka ri india.
U la pynpaw ruh ba ka jingmih ki jain ryndia, ki jain muga, ki jain rusom bad ki jain tasar na kine ki jylla shatei lam mihngi ka ri india ka pynlong ïa kari India ba kan long kaba kyrpang bad wat ïa kane la don ka jingithuh wat shaduh ka ri China.
Kum u Myntri ka sorkar pdeng, u Giriraj Singh u la bynrap ruh da kaba ong, ba ka sorkar pdeng ka phai khmat bha sha ki jylla shatei lam mihngi ka ri India bad ka jingpaw kine ki jylla ha ki kam ban pynmih ïaki jain ryndia, ki jaiñ muga, ki jaiñ rusom bad ki jaiñ tasar ka pynpaw ba ki jylla shatei lam mihngi ka ri india ki don ïa kata ka jinglong kaba kyrpang bad kane kan weng ruh ïa kata ka jingshah ban beiñ ki samla ha ka ri India hi baroh kawei lyngba kane ka jinglong kyrpang jongki, u la bynrap.