SHILLONG, Nailar 13: U Myntri Rangbah ka Jylla Meghalaya, u Conrad K Sangma ha ka 12 tarik Nailar, 2025 jong ka miet sngi Ba-ar u la plie paibah ïa ki ar tylli ki projek ïalehkai ha Nongkseh, kiba kynthup ïa ka Nongkseh Artificial Turf Football Ground cum Sitting Gallery bad ïa ka Nongkseh Basketball Court.
ïa kine ki projek la plie ha ka jingïalang ba la pynlong da ka Dorbar Shnong Raid Sawkur Nongkseh bad ka Nongkseh Sports Social & Cultural Club (NSSCC), kine ki jingthmu ki thmu ban kyntiew ïa ka kam ïalehkai, ban kyntiew ïa ka rukom im kaba koit kaba khiah, bad ban pynshlur ïa ki lad kamai kiba neh na ka bynta ki nongshong shnong jong ka Nongkseh bad ki thaiñ ba marjan.
Haba ai jingkren sha ki paidbah, u Myntri Rangbah u la kren shaphang ka jingleit jurip jong u kaba kham mynshwa sha Nongkseh shuwa ban tei ïa ka madan phutbol, da kaba pynkynmaw ba kumno ki khynnah ki ïalehkai ha ki jaka kiba kham duna. U la pynpaw ïa ka jingsngewhun ïa kane ka jingkylla kaba khraw, da kaba khot ïa kine ki projek kum ka “jingkylla kaba pura” kaba pyni nuksa ïa ka jingkiew kaba dang ïaid shaphrang jong ka Meghalaya.
Na ka liang jong u Myntri Rangbah u la ban jur ruh ba kine kine ki jaka ki pyni kham bun shah ban ïa ki jingtei ïa ki jaka ïalehkai — ki dei ki dak kiba lah ban ïohi jong ka jingroi ka ïoh ka kot kaba kham ïar bad kaba kynthup lang ïa ka Meghalaya.
U la pynpaw ïa ka kaiphod ba dang shen jong ka Sorkar India kaba buh ïa ka jylla Meghalaya kum ka jylla ba ar ha ka jingroi sted ha ka ri katkum ka Gross State Domestic Product (GSDP), tang hadien jong ka Tamil Nadu.
Haba kubur ïa ki jingartatien shaphang ka Meghalaya ban poi sha ka T.85 lak klur ka ïoh ka kot (kaba ïaryngkat bad $10 billion) ha u snem 2028, u la pynskhem ba ka jylla mynta ka don ha ka lynti kaba dei bad pyntip ba ki jingbei tyngka jong ka sorkar kiba kyrshan ïa kane ka jingkiew ki kynthup ïa ka T.1,900 klur tyngka na ka bynta ki jingtei ïa ki jaka ïalehkai.
Ha kane ka sngi la ïa donlang ruh u Myntri ka tnad ïalehkai u Bah Shakliar Warjri, u MLA ka Mylliem u bah Ronnie V. Lyngdoh, u nongai jingmut jong u Myntri Rangbah ka jylla u Bah Hamletson Dohling, u Chief Secretary ka jylla u Bah D.P. U Wahlang, u R.M. Kurbah (IAS), Deputy Commissioner ka East Khasi Hills.
