Plie u Myntri Rangbah ïa ki lai tylli ki ‘Collective Marketing Center’ u Shynrai Lakadong ha Laskeiñ Block

Jowai, Jymmang 10: U Myntri Rangbah ka jylla u Conrad K Sangma mynta ka sngi ula wan plie ïa ki lai tylli ki jaka kynshew bad pynïaid ïew ïa u Shynrai Lakadong ne ki ‘Collective Marketing Center’ ha ka shnong Thadmuthlong A, ha Shangpung Pohshnong bad kawei ka Mootyrshiah-B kaba don ha Laskeiñ.
Ha kane ka sngi u Myntri Rangbah ula plie ruh ïa u maw nongrim jong ka jaka ai jinghikai (Prime Hub) kaba don lang ha katei ka jaka pynmih ïa utei u shynrai ha Laskeiñ bad ka jingdon kane ka jaka kan ïarap ïa kiwei de ki para nongrep ba kin tip shaphang ka rukom rep ïa une u mar.
Ïa kitei ki Collective Marketing Center u Myntri rangbah ula plie ïa ki lyngba ka Mission Lakadong hapoh ka jingpeit jong ka tnad Director of Horticulture jong ka Sorkar Jylla. Kane kan ïarap shuh shuh ïa ki nongrep ka thaiñ ba kin tip haduh katno ka jinglah jong ki ban pynmih ïa une u mar bad kumjuh ruh ïa ka rukom pynïaid ïew ïa u kan long kaba biang namar na ka por sha ka por ki nongrep kim ïoh satia ïa ka dor ba tikna naba ka dor jong u kala ïapher na uwei u nongdie sha uwei pat.
Na ka liang u Myntri Rangbah uba ai mynsiem khamtam ïa kawei na ka kynhun trei mon sngewbha la ‘Life Spice Cooperation Society’ hapoh ka shnong Laskeiñ kaba pynïaid ïa katei ka jaka ban pynmih ïa u Shynrai Lakadong naduh ka rukom lum ïa u, ka rukom siat, ka rukom shet, ka rukom ah bad haduh ka rukom song (Packing) ïa u Shynrai.
La seng ïa kane ka kynhun ha u snem 2006 kum ka (Federation) bad ha ka snem 2007 ka kynhun jong ka kila ïoh lad ban leit ïa shim bynta ha nongbah Delhi bad hadien ba la poi na katei ka jaka kane ka kynhun kala ïoh lad ban seng noh ïa kane jaka hapoh ka Laskeiñ ban pynmih ïa u Shynrai Lakadong.
La kyntu ïa katei ka Society ba kan dang ïaid shaphang ban pynkiew shuh shuh ïa utei u mar rep ba paw ha ka pyrthei, da kaba u kyntu jur ïa kane ka Society ba kan ai jinghikai lem ïa kiwei de khnang ba kan long ka jingmyntoi ïa kiwei de ki nongrep hapoh ka jylla.