Plie u Myntri Rangbah ïa ka samoi ïalehkai phutbol jong ka SSA na ka bynta u snem 2025

Shillong, Jylliew 15: U Myntri Rangbah ka Jylla Meghalaya u Conrad K. Sangma ha ka sngi Saitjaiñ jong ka taïew ba ladep, u la plie pyrda ïa ka lympung ïalehkai Fourth Division Football League jong ka Shillong Sports Association (SSA), da kaba pynpaw biang ïa ka jingangnud jong ka Sorkar Jylla ban kyntiew ïa ka phutbol bad ban buh ïa ka Meghalaya ha ka kyrdan kum ka nongbah jong ka phutbol jong ka ri India.
Ka Fourth Division ka dei ka lympung ïalehkai Under-20, ha kaba ki don 29 tylli ki team kiba ïashim bynta. Ha kaba kut jong kane ka samoi, ki ar tylli ki kynhun kiba kynsai tam na kane ka kyrdan kin kiew sha ka Third Division.
Ka jingïalehkai kaba nyngkong ka la long kaba itynnad ha kaba ka Golflink SC ka la wanphai nadien ban pynliem kylla ïa ka Thynroit da 4-3 kol ha ka sngi sdang ïa ka U-20 Fourth Division Football league 2025 ha madan First Ground, SSA Stadium, ha ka sngi Saitjaiñ.
Watla ka lympung ‘U-20 Fourth Division FL’ ka dei ka kyrdan kaba rit tam napdeng ki lympung phutbol jong ki shynrang jong ka SSA hynrei baroh ar tylli ki kynhun kiba na ka Group-A, ki la wanrah ryngkat bad ki ïa ka jingïalehkai phutbol kaba shongkun.
Ha kane ka jingïalehkai ka Thynroit ka la ïoh ban lamkhmat haduh lai sien lai wat hynrei ka Golflink ka la pynïakhaid ha baroh lai tylli ki khep shuwa ban knieh jynjat ïa ka jingjop ha ka khyllipmat ba khatduh.
Ka Thynroit ka la ïoh ban lamkhmat lyngba u Fairlywell Nongspung (10’minit) uba la pynkhih ïa ka kol kaba nyngkong jong ka samoi, katba ka Golflink ka la pynsyrwa ïa ka kabu na ka penalty hadien ba ka jingpyrshang ka la sangah ïa u diengkol (crossbar), hynrei watla kata ruh u Banteilang Wahlang (32’minit) u la lah ban pynïakhaid lyngba ka free-kick.
Ka jingkmen ka la neh tang lai minit, ha kaba u Fairlyway (35’minit) u la ïoh ïa ka kol kaba ar jong u ban buh biang ïa ka Thynroit hakhmat haduh kaba kut jong ka kylla step.
Katto katne minit ba la ïaid ka kylla miet u Ridonroy Laloo (56’min) u la pynïakhaid biang na ka bynta ka Golflink, hynrei sa shisien pat ka Thynroit ka la jubab ban lamkhmat ïa ka jingïakhun, lyngba u Melijohn Sohtun (57’min).
Kumba la long ïa ki ar kol ka Golflink ka la pynïakhaid biang ha ka minit kaba 68 lyngba u Ribanshan Wahlang, bad kane ka la ai mynsiem ïa ka kynhun tad haduh ba kan da ïoh ban thep ïa ka kol kaba saw na u Mebanaibor Nongkhlaw (80’+2) kaba la ai ïa ka jingjop kaba sah jingkynmaw ïa ka Golflink bad ban sdang ïa ka samoi phutbol jong ka SSA ha ka rukom kaba shongkun.
Shuwa ban sdang ïa ka jingïalehkai, na ka liang jong u Myntri Rangbah ka Jylla u Conrad K Sangma u la pynbna ba un kyrshan ïa ka SSA na ka bynta ki league bapher bapher mynta u snem da ka pisa kaba T.30 lak, kaba long ka jingkyntiew ïa ka jingkyrshan pisa jong u snem ba la dep.
U Myntri Rangbah u la ïakynduh ruh ïa ki nongïalehkai na baroh ki kynhun ba ïashim bynta ha ka Fourth Division bad u la aiti ruh ïa ki mementos na ka SSA sha ki arngut ki kynthei kiba long nongpynïaid (match official) – ka Lucky Merry Lyngdoh bad ka Batbitbha Bareh – halor ka jingïoh kyrdan kum ki national referee.
Kiba la donlang ha kane ka sngi plie ïa ka Fourth Division League nalor u Myntri Rangbah ka jylla u Conrad K. Sangma ki long u Bah Dipshon L. Nongbri (Honorary General Secretary, SSA), u Robert Dkhar (Working President, SSA), u Bah Finely Pariat -General Secretary ka Meghalaya State Olympic Association, u Bah Daniel M. Thangkhiew – Vice President ka SSA, ki rangïalehkai jong baroh ki kynhun ba shim bynta ha ka Fourth Division bad kiwei de ki riew rangbah.
Ka prokram ïalehkai ha kane ka sngi Nyngkong ki long: ka Mawshbuit kan ïakhun pyrshah ïa ka Risa Colony, Group A, ha ka por 1:30 baje mynsngi, nangta ka Them Rangshken pyrshah ïa ka Mawlyngad, Group B, ha ka por 4:15 baje jan miet.